އައްޑޫ ސިޓީ ކައުންސިލް އިދާރާގެ ޒިންމާދާރު ވެރިޔާ މުހައްމަދު ސައުދީ އަށް މިދިޔަ އަހަރުތެރޭ އިތުރު ގަޑީގެ ފައިސާގެ ގޮތުގައި 72،000ރ. ދީފި އެވެ.
އައްޑޫ ސިޓީ ކައުންސިލުގެ ގަރާރަކުން ސައުދީ އަށް ކޮންްމެ މަހަކު 6،000ރ. ދިނުމަށް ނިންމާފައިވާ ލިއުމެއްގެ ކޮޕީ ވަނީ "އައްޑޫ ލައިވް" އަށް ވެސް ލިބިފަ އެވެ.
މިދިޔަ އަހަރުގެ ގެ ޖެނުއަރީގައި ސިޓީ ކައުންސިލުން ފާސްކޮށްފައިވާ ގަރާރުގައިވާ ގޮތުން އައްޑޫ ސިޓީ ކައުންސިލް އިދާރާގެ ޒިންމާދާރު ވެރިޔާ މަސައްކަތެއް ކުރިޔަސް ނުކުރިޔަސް ކޮންމެ މަހަކުވެސް 6،000ރ. އިތުރު ގަޑީގެ އެލެވެންސް ފައިސާ އޭނާ އަށް ދިނުމަށް ނިންމާފައި ވެ އެވެ.
މިކަމާ ގުޅިގެން ކައުންސިލަރު ހުސެއިން ފަހުމީ ވިދާޅުވީ ކައުންސިލުން އެގޮތަށް ފާސް ކުރީ އެ މުވައްޒަފަކީ ވަރަށް ގިނަ ވަގުތު މަސައްކަތް ކުރަން ޖެހޭ މުވައްޒަފަކަށް ވެފައި އިތުރު ގަޑީގެ ގޮތުގައި ދޭން ޖެހޭ ފައިސާ ކަނޑައެޅޭނެ ގޮތެއް ނެތުމުން 6،000ރ. ކޮންމެ މަހަކު ވެސް ދޭ ގޮތަށް ހަމަޖެއްސީ ކަމަށެވެ.
ފަހުމީ ވިދާޅުވީ ކައުންސިލް އިން ޤަބޫލު ކުރާ ގޮތުގައި، އެގޮތަށް 6000ރ. އިތުރު ގަޑީގެ ފައިސާ ގޮތުގައި ދިނުމަކީ ކައުންސިލަށް ކުރެވިދާނެ ކަމެކެވެ. އަދި އެކަން ފަހުމީ "ޖަސްޓިފައިކޮށް" ކުރެއްވި އެވެ.
ފަހުމީ އިތުރަށް ވިދާޅުވީ ކައުންސިލުންދެނީ ކައުންސިލް ގެ ފައިސާ ކަމަށާއި ކައުންސިލުން ނިންމުމުން އެ ފައިސާ އެގޮތަށް ދެވޭނެ ކަމަށެވެ. އެގޮތުން މުވައްޒަފުން "މޯޓިވޭޓް" ކުރަން "އިންސެންޓިވް" އެއްގެ ގޮތުގައި ދެވިދާނެ ކަަމަށް އޭނާ ވިދާޅުވި އެވެ.
މިކަމާ ގުޅޭ ގޮތުން ލޯކަލް ގަވަރަމަންޓް އޮތޯރިޓީ (އެލްޖީއޭ) އަށް ގުޅުމުން އެތަނުގެ އޮފިޝަލަކު ވިދާޅުވީ އެފަދަ މައްސަލައެއް އެލްޖީއޭ އަށް ލިބިފައިވާ ކަމަށާއި މައްސަލަ މިހާރު ދިރަސާ ކުރަމުން އަންނަ ކަމަށެވެ.
އަދި އެއްވެސް ގޮތަކަށް ސިވިލް ސާވެންޓެއްގެ މުސާރަ އާއި އިނާޔަތްތައް ކަނޑައެޅުމުގެ ބާރު ކައުންސިލަށް ލިބިފައި ނުވާނެ ކަމަށް އެލްޖީއޭ އިން ބުންޏެވެ. އަދި އެފަދަ ނިންމުމެއް ނިންމޭނީ ސިވިލް ސާވިސް ކަމިޝަން (ސީއެސްސީ) އިން ކަމަށް ވެސް އެލްޖީއޭ އިން ބުންޏެވެ.