މާލެ ފިޔަވައި ރާއްޖޭގެ އެންމެ އާބާދީ ބޮޑު ސިޓީ އާއި ބެހޭގޮތުން މިހާރުވެސް ސަރުކާރުގެ ވުޒާރާތަކުގެ އިސްވެރިން ޤަބޫލުކުރާ ގޮތަކީ މިއެވެ. "އައްޑޫ މީހުންނަކީ ވަރަށް ނުލަފާ ބައެކެވެ. ގޮތް ދޫނުކުރާ ބައެކެވެ."
މިފަދަ ޤަބޫލުކުރުންތައް އެބޭފުޅުން ގެންގުޅުއްވާ ސަބަބު ނޭނގުނު ނަމަވެސް އައްޑޫގެ މެޖޯރިޓީ ރައްޔިތުންނަކީ އަބަދުވެސް އެމީހުންގެ ހައްޤުތައް ހޯދަން ވަކާލާތު ކުރަމުން އަންނަ މީހުންނެވެ.
ޔުނައިޓެޑް ސުވާދީބް ރިޕަބްލިކް (އެކުވެރި ސުވާދީބު ޖުމްހޫރިއްޔާ) 23 ސެޕްޓެމްބަރު 1963 އުވާލެވުނު ފަހުން 57 އަހަރަށް ވުރެ ގިނަ ދުވަސް ވެގެން ދާއިރު ވެސް ދެކުނުގެ ރައްޔިތުންގެ ފިކުރަކީ ހަމަ "ސުވަދީބު ފިކުރު" ކަން ޔަޤީނެވެ. އެ ފިކުރަކީ އަތޮޅަށް ލިބޭ ފައިސާ އިން އަތޮޅު ތަރައްޤީ ކުރުމުގެ ވިސްނުމެވެ.
2011 ވަނަ އަހަރު އައްޑޫއަށް ސިޓީއެއްގެ ދަރަޖަ ހޯދުމަށް އެދި އައްޑޫ ރައްޔިތުން ނިކުމެ މުޒާހަރާ ކުރީ އެހެންވެގެންނެވެ. ލޯކަލް ކައުންސިލްތައް އުފެދުމާއި އެކު އަތޮޅު ތަރައްޤީކުރުމަށް އަމިއްލައަށް ބަސްބުނެވޭނެ ތީއެވެ.
ކަތީބުންގެ ޒަމާނުގައި މާލޭ ސަރުކާރުން އަންގައިގެން ނޫންގޮތަކަށް ރަށުން ބޭރަށް ފުރައިގެން ދިއުން ވެސް މަނާކޮށްފައި އޮތް އޮތުން ނިމުމަކަށް ގެނައުމަށް ބޭނުންވުމުންނެވެ.
އައްޑޫ އަށް ސިޓީއެއްގެ ދަރަޖަ ދޭން އެމްޑީޕީ ސަރުކާރުން ނިންމުމުން އެކަމާއި ދެކޮޅު ހެދި ބަޔަކު ކޯޓަށް ވެސް ދިޔައެވެ. އެމްޑީޕީ ފިޔަވައި ރާއްޖޭގެ ހުރިހާ ސިޔާސީ ޕާޓީއެއް އޭރު ތިބީ ސިޓީގެ ދަރަޖަ ދިނުމާއި ދެކޮޅަށެވެ. އެހެން ނަމަވެސް ދިމާވި ހުރަސްތަކާއި އެކު ވެސް އައްޑޫ އަށް ސިޓީގެ ދަރަޖަ ލިބުނެވެ.
އެންމެ ފުރަތަމަ ބޭއްވި ކައުންސިލް އިންތިޚާބުގައި އެމްޑީޕީން 6 ގޮނޑިވެސް ކާމިޔާބު ކުރީ އެސަބަބަށްޓަކައި ކަމަށް ވެދާނެއެވެ.
އައްޑޫގެ ފުރަތަމަ ސިޓީ ކައުންސިލަށް ލިބުނު ބާރުތަކާއި އެކު އައްޑޫގެ ރައްޔިތުންގެ މަންފާއަށްޓަކައި ކަންތައް ކުރަން ފެށިއެވެ. އެހެނަސް އެކަމަށް ހުރަސްތަކެއް ދިމާވީ ކައުންސިލު އިންތިޚާބުވިތާ ކުޑަ ދުވަސްކޮޅެއްގެ ތެރޭގައި އެމްޑީޕީގެ ވެރިކަން ބަދަލުވެ އެމްޑީޕީ ފިކުރާއި މުޅިން އިދިކޮޅު ބަޔަކު ވެރިކަމަށް އައި ހިސާބުންނެވެ.
ސާކް ސަމިޓަށް އައްޑޫގައި ބިނާކުރި ކޮންވެންޝަން ސެންޓަރު ކުއްޔަށް ދޫކޮށްގެން އާމްދަނީ ހޯދާނެހެން ހީވުމުން އެކަން ވެސް މައި ސަރުކާރުން ވަނީ ހުއްޓުވިއެވެ. އެއަށް ފަހު މެދުކެނޑުމެއް ނެތި ކައުންސިލް އުވާލާނެ ކަމުގެ އިންޒާރުތައް ދެމުން ދިޔައެވެ.
މިފަދަ ގޮތަކަށް ކަންތައް ވަމުން ގޮސް ދެވަނަ ދައުރަކަށް ކައުންސިލް އިންތިޚާބު ކުރި އިރު ވެސް ހުރިހާ ގޮނޑިއެއް ނެގީ އެމްޑީޕީންނެވެ. ކައުންސިލްގެ ދެވަނަ ދައުރުގައި އައްޑޫގައި ގެސްޓް ހައުސް ވެންޗަރގެ ބިޔަ މަޝްރޫޢެއް އިއުލާންކުރި ހިސާބުން ކައުންސިލަށް ފުލުފުލުގައި އިންޒާރާއި ބަހުގެ ހަމަލާތައް ލިބެން ފެށިއެވެ. ވަކި ހިސާބަކުން މައި ސަރުކާރުން ގަދަބާރުން އެ މަޝްރޫޢު ހުއްޓުވާލިއެވެ.
އެއަށް ފަހު އައްޑޫގައި ދުއްވާ ވެހިކަލްތަކުން ނަގާ ފީތައް މައި ސަރުކާރަށް ނުދީގެން މައްސަލަ ޖެހުނެވެ. ކައުންސިލްގެ "ކަރަށް ފައިން އެރުމަށްފަހު" އެފައިސާ ވެސް މައި ސަރުކާރަށް ލިބޭގޮތް މިހާރު ވަނީ ހަދާފައެވެ.
އެލްޖީއޭ އިން ބަހަނާ ދައްކާފައި އައްޑޫ ސިޓީ ކައުންސިލަށް ހުރަސް އަޅަމުން ގެންދާއިރު އައްޑޫ ރައްޔިތުން ބުނެލަން އޮތީ އައްޑޫ ބަހުރުވައިން ދޭ މެސެޖަކީ މިއެވެ.. "ތަފިރިން އައްޑޫ ކާފެއި ބޯފެއު" މިއެވެ.
ރައީސް އަބްދުﷲ ޔާމީން ވެރިކަމަށް ވަޑައިގެންނެވުމާއި އެކު އަނެއްކާވެސް އައްޑޫ ސިޓީ ކައުންސިލަށް އިންޒާރުތައް ލިބެން ފެށިއެވެ. ކައުންސިލުން ސަރުކާރަށް އެއްބާރުލުން ނުދޭ ކަމުގެ ބަހަނާ ދެއްކުމަށް ފަހުއެވެ. އެއަށް ފަހު ދުވަސްކޮޅެއްގެ ތެރޭގައި ޤާނޫނެއް ފާސްކޮށް އައްޑޫ ސިޓީ ކައުންސިލްގެ ފިޔަތައް ކޮށާލިއެވެ.
ކައުންސިލްގެ ހުރިހާ ބާރެއް އަތުލުމަށް ފަހު ހައުސިން މިނިސްޓްރީގެ ގޮތްޕެއް ޤާއިމްކުރިއެވެ. "ރައްޔިތުންނާއި ގާތުން ޚިދުމަތް ދިނުން" ބަހަނާއަކަށް ދައްކައިގެންނެވެ.
ހައުސިންގެ ގޮތްޕެއް އައްޑޫގައި ޤާއިމްކުރިތާ ކުޑަ ދުވަސްކޮޅެއްގެ ތެރޭގައި ކުރި ވިއްސާރައެއްގައި ރައްޔިތުން ހާލުގައި ޖެހުނުއިރު އެ ގޮފީގެ އިސްބޭފުޅުން ތިއްބެވީ މާލޭގައެވެ. އެދުވަހު ވެސް ވާރެޔާއި ތެމިފޯވެގެން ރައްޔިތުންގެ ހައްޤުގައި ނިކުންނެވީ "ފިޔަތަށް ކޮށާލާފައި" އޮތް އައްޑޫ ސިޓީ ކައުންސިލްގެ މެންބަރުންނެވެ.
ބާރުތައް ނަގައިގެން ހަމައެކަނި ވިހާ މަރުވާ މީހުންގެ ލިސްޓް ބަލަހައްޓާ ތަނަކަށް އައްޑޫ ސިޓީ ކައުންސިލް ހެދި ނަމަވެސް މައި ސަރުކާރަށް ކައުންސިލް ހުއްޓުވޭ ގޮތެއް ނުވިއެވެ. ހުރިހާ އާރާއި ބާރެއް ދީފައި އައްޑޫގައި ޤާއިމްކުރި ހައުސިންގެ ޑިޕާޓްމަންޓަށް އައްޑޫއަށް ކަމެއް ކޮށްނުދެވި ތިއްބައި ކައުންސިލުން ޕާކުތަކާއި އައުޓްޑޯ ޖިމްތައް ޤާއިމް ކުރަން ފެށިއެވެ.
އެ މަސައްކަތް ވެސް ކުރިއަށް ގެންދަން ފެށުމުން ހައުސިން މިނިސްޓްރީގެ އައްޑޫ ޑިޕާޓްމަންޓުން ތަފާތު އެކި ހުރަސްތައް ކުރިމަތިކުރުވިއެވެ. އެ ހުރަސްތަކާއި އެކު ވެސް ކައުންސިލަށް ކުރެވުނު ކަމެއް އައްޑޫގެ ރައްޔިތުންނަށް ޓަކައި ކޮށްދެމުން ދަނިކޮށް މިއަދު މިވަނީ ކައުންސިލް އުވާލަން ޖެހިދާނެ ކަމުގެ އިންޒާރު ލިބިފައެއެވެ.
ސިޔާސީ ގޮތުން ކައުންސިލަރުން ހިންގި ހަރަކާތްތަކެއް ބަހަނާއެއްގެ ގޮތުގައި ދެއްކުމަށް ފަހު އައްޑޫގެ މޭޔަރާއި ޑެޕިއުޓީ މޭޔަރު ހިމެނޭ ގޮތަށް 4 ކައުންސިލަރަކު ސަސްޕެންޑްކުރީއެވެ.
އައްޑޫގެ ގިނަ ރައްޔިތުން ޤަބޫލުކުރާ ގޮތުގައި ކައުންސިލް އުވާލުމަކީ މައި ސަރުކާރުގެ ފަރާތުން ދުރާލައި ރާވައިގެން ހިންގި "ޖަރީމާ" އެކެވެ. އައްޑޫ ރައްޔިތުން އަޅުވެތި ކުރަން މައި ސަރުކާރުގެ ސިޔާސަތު ހާމަކޮށްދޭ ނިންމުމެކެވެ.
މީގެ 57 އަހަރު ކުރިން އައްޑޫގެ ފަޚުރުވެރި ދަރިއެއް ކަމުގައިވާ އަފީފްދީދީ، އިސްވެ ހުންނަވައި ވަކި ދައުލަތެއް އުފެއްދެވީ މިފަދަ އަޅުވެތިކަމާއި އައްޑޫ ރައްޔިތުން ދެކޮޅުވީމައެވެ. އަދިވެސް އައްޑޫ ރައްޔިތުންގެ ފިކުރަކީ، އަޅުވެތިކަމާޢި ދެކޮޅު، ސުވަދީބު ޖުމްހޫރިއްޔާގެ ފިކުރެވެ.
މައި ސަރުކާރުން ސުވަދީބު ދައުލަތް އިއުލާން ކުރުމަކީ ބަޣާވާތެއް ކަމަށް ސިފަކުރިޔަސް ދެކުނުގެ އަތޮޅު ތަކުގެ ރައްޔިތުން ޤަބޫލުކުރާ ގޮތުގައި އެއީ ފަޚުރެކެވެ.
އެލްޖީއޭ އިން ބަހަނާ ދައްކާފައި އައްޑޫ ސިޓީ ކައުންސިލަށް ހުރަސް އަޅަމުން ގެންދާއިރު އައްޑޫ ރައްޔިތުން ބުނެލަން އޮތީ އައްޑޫ ބަހުރުވައިން ދޭ މެސެޖަކީ މިއެވެ.. "ތަފިރިން އައްޑޫ ކާފެއި ބޯފެއު" މިއެވެ.