ލޯކަލް ގަވަރމަންޓް އޮތޯރިޓީ(އެލްޖީއޭ) އިން ނެރޭ ޣައިރު ޤާނޫނީ އަމުރުތަކަށް ކައުންސިލްތަކުން ކިޔަމަންވާން ނުޖެހޭ ކަމަށް އައްޑޫ މީދޫ ދާއިރާގެ މަޖިލިސް މެންބަރު ރޮޒެއިނާ އާދަމް _(ރޮޒޭ) ވިދާޅުވެއްޖެއެވެ.
އޭނާ މިހެން ވިދާޅުވީ، އައްޑޫ ސިޓީ ކައުންސިލްގެ މޭޔަރާއި 3 ކައުންސިލަރަކު ސަސްޕެންޑްކުރުމާއި ގުޅިގެން ނުރުހުން ފާޅުކުރައްވައި ކުރެއްވި ޓްވީޓެއްގައެވެ.
އައްޑޫ ސިޓީ ކައުންސިލްގެ މެންބަރުންތަކެއް ސަސްޕެންޑް ކުރީ، ސުޕްރީމް ކޯޓުން 1 ފެބްރުއަރީގައި ނެރުނު އަމުރު ތަންފީޒު ކުރުމަށް ގޮވާލައި ކައުންސިލުން ނެރުނު ޤަރާރަކާއި ގުޅިގެންނެވެ.
އެކަމާއި ބެހޭގޮތުން ރޮޒެއިނާ ވިދާޅުވީ ސުޕްރީމް ކޯޓުގެ އަމުރެއް ތަންފީޒު ކުރަން ގޮވާލުމަކީ ކުށެއް ނޫން ކަމަށެވެ. އަދި އެއީ ޤާނޫނީ ގޮތުން އެލްޖީއޭ އިން ވެސް ތަބާވާން ޖެހޭ އަމުރެއް ކަމަށް ރޮޒޭ ވަނީ ފާހަގަކުރައްވާފައެވެ.
ކައުންސިލުން ނެރުނު ޤަރާރުގައި ބުނެފައިވަނީ ސުޕްރީމް ކޯޓުގެ އަމުރު ތަންފީޒު ނުކޮށް ލަސްކުރުމަކީ އައްޑޫގެ ރައްޔިތުން ނުހަނު ކަންބޮޑުވާ ކަމެއް ކަމަށެވެ.