އައްޑޫ ގަމުގައި ހިންގަމުން އަންނަ ސްރީލަންކާގެ ފްލައިން ސްކޫލް އޭޝިއަން އެކެޑެމީ އޮފް އެއިރޮނޮޓިކްސް (އޭއޭއޭ) ގެ ދަރިވަރުންނަށް ޓްރެފިކް ޤަވާއިދުތަކާއި ބެހޭގޮތުން މައުލޫމާތު ދިނުމަށް ފުލުހުންގެ ފަރާތުން ބައްދަލުވުމެއް ބާއްވައިފި އެވެ.
ފްލައި ސްކޫލްގެ އިމާރާތުގައި ބޭއްވި މި ބައްދަލުވުމުގައި މަގުމަތީގެ ސަލާމަތާއި ރައްކާތެރިކަން ކަށަވަރު ކުރުމަށްޓަކައި ސަމާލުކަން ދޭންޖެހޭ ކަންތަކާއި ބެހޭގޮތުން ފުލުހުން ވަނީ މައުލޫމާތު ދެއްވާފައެވެ.
މިއީ އައްޑޫ ސިޓީ ޕޮލިހާއި ޓްރެފިކް މެނޭޖްމަންޓް ޑިޕާޓްމަންޓް ގުޅިގެން ކުރިއަށް ގެންދިޔަ ބައްދަލުވުމެކެވެ.
ފްލައި ސްކޫލްގެ ދަރިވަރުންނަށް މިފަދަ ބައްދަލުވުމެއް ކުރިއަށް ގެންގޮސްފައިވާއިރު، މިފަހުން ލިންކް ރޯޑްގައި ހިނގި އެކްސިޑެންޓްތަކުގައި ފްލައި ސްކޫލްގެ ބައެއް ދަރިވަރުންނަށް އަނިޔާވެފައި ވެއެވެ. އަދި 2016 ވަނަ އަހަރުގެ ތެރޭގައި ފްލައި ސްކޫލްގެ ދަރިވަރަކު ދުއްވި ސައިކަލުން ޖެހި ހިނގި އެކްސިޑެންޓެއްގައި މީހަކު ނިޔާވެފައި ވެއެވެ.