މެކްސިކޯގައި ދެ ވައިކުޑަ ވައިގެ ތެރޭގައި އެކްސިޑެންޓްވެ އަންހެނަކު ވެއްޓި މަރުވެއްޖެ އެވެ.
މި ހާދިސާ ހިނގާފައި ވަނީ މިދިޔަ ހޮނިހިރު ދުވަހު މެކްސިކޯގެ ރިސޯޓް ރަށެއް ކަމަށްވާ ޕިއޮޓޯ އެސްކޮންޑިޑޯގަ އެވެ. ދެ ވައިކުޑަ އެކްސިޑެންޓްވާ ވީޑިއޯ ވެސް މިހާރު ސޯޝަލް މީޑިއާގައި އާންމުވެފައިވާ އިރު، އެއިން ފެންނަނީ އެއް ވައިގައި ކުޑަ ވަރަށް ބާރަށް ގޮސް އަނެއް ވައިކުޑައާ، ފައްތަރުވެ، އެކަތީގައި އިން މީހާ ރާސްލާފައި ބިންމައްޗަށް ވެއްޓޭ ތަނެވެ.
ވެއްޓި ބިންމަތީގައި ޖެހުނު ގޮތުން މަރުވީ ޗުއްޓީ ހޭދަ ކުރަމުން ދިޔަ މެކްސކޯ ސިޓީ އަށް ނިސްބަތްވާ އުރްސުލާ ހަނެންޑޭޒް ކިތާ އުމުރުން 47 އަހަރުގެ އަންހެނެކެވެ.
މި ވީޑިއޯ ނެގީ ހާދިސާ ހިނގި އިރު އަތިރިމަތީގައި ތިބި މީހުންގެ ތެރެއިން މީހެކެވެ.
ރިޕޯޓްތައް ބުނާ ގޮތުން މި ހާދިސާ ހިނގުމާ އެކު، އުރްސުލާ ކައިރި ހޮސްޕިޓަލަށް ގެންދިޔަ އިރު ވެސް މަރުވެފައިވާ ކަމަށް ޑޮކްޓަރު ވަނީ ބުނެފަ އެވެ. އަދި އަނެއް ވައިކުޑައިގައި އިން މީހާ އަށް ވެސް އެކި ވަރުގެ ޒަހަމްތައް ލިބުނު ނަމަވެސް ސީރިއަސް އެއްވެސް ގެއްލުމެއް ނުލިބެ އެވެ.
މި ހާދިސާއާ ބެހޭ ގޮތުން މެކްސިކޯގެ ނޫސްވެރިއެއް ކަމަށްވާ ޔުއާން ޕެރޭޒް ބުނީ މެކްސިކޯއަކީ ކުއްޔަކަށް ވައިކުޑަ ދޫކުރާ މީހުން ވަރަށް ގިނައިން އުޅޭ ތަނެއް ކަމަށެވެ. އަދި އެފަދަ ހިދުމަތެއް ދޭ އިރު، ކަސްޓަމަރުންގެ ރައްކާތެރިކަން ބެލޭނެ ހަރުދަނާ ނިޒާމެއް ނެތުމަކީ މެކްސިކޯ އަށް ދާ ޓޫރިސްޓުންނަށް އޮތް ބިރެއް ކަމަށެވެ.
"އެހެންވެ މި ކަހަލަ ކަންކަން ރެގިއުލޭޓް ކުރެވޭނެ އިންތިޒާމްތަކެއް އެބަ ޖެހޭ ހޯދަން. އިންސާނެއްގެ ފުރާނަ ގެއްލިގެން ދިއުމަކީ އެއްގޮތަކަށް ވެސް ކުޑަ ކަމެއް ނޫން." އޭނާ ބުންޏެވެ.