މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ގެ ވަޒީފާތަކަށް ޝައުޤުވެރިވާ އައްޑޫގެ ޒުވާނުންނަށް ބާއްވާ ވޯކްއިން އިންޓަވިއު އެއް މާދަމާ އޮންނާނެއެވެ.
މި އިންޓަވިއު ކުރިއަށް ގެންދާނީ މާދަމާ ހެނދުނު 9:00 އިން ފެށިގެން ރޭގަނޑު 9:00 އަށް، ފޭދޫގައި ހުންނަ އެމްޓީސީސީ އައްޑޫ ސައިޓް އޮފީހުގައެވެ.
'އައްޑޫލައިވް' އަށް މައުލޫމާތު ލިބިފައިވާ ގޮތުގައި މާދަމާ އޮންނަ ވޯކްއިން އިންޓަވިއުގައި އެމްޓީސީސީން 31 މުވައްޒަފުން ނަގާނެއެވެ.
އޭގެ ތެރޭގައި ހިމެނޭ ހޭންޑީ ޕާސަން (ލޭބަރު) ކަމުގެ މަޤާމުގެ 25 ވަޒީފާގެ ފުރުސަތު ހިމެނޭ އިރު މުސާރައިގެ ގޮތުގައި ދުވާލަކަށް -/350 ރުފިޔާ ލިބޭނެއެވެ. އަދި މޭސަނުންގެ ވަޒީފާއަށް 3 މީހަކު ނަގާއިރު އެމީހުންނަށް މުސާރައިގެ ގޮތުގައި ދުވާލަކަށް -/420 ރުފިޔާ ލިބޭނެއެވެ.
އަދި މީގެ އިތުރުން މާދަމާ ބާއްވާ އިންޓަވިއުގައި، ދުވާލަކަށް -/420 ރުފިޔާގެ މުސާރައަކަށް 3 ކާޕެންޓަރުން ވެސް ހޯދާނެއެވެ.
މި ވަޒީފާތަކަށް ނަގާ މީހުން މަސައްކަތް ކުރާނީ އެމްޓީސީސީން އައްޑޫގައި ހިންގާ ޕްރޮޖެކްޓް ތަކުގައެވެ.
އައްޑޫ ސިޓީ، މަރަދޫ، ފޭދޫ އަދި މަރަދޫފޭދޫގައި ނަރުދަމާ އެޅުމުގެ މަސައްކަތް ހަވާލުކޮށްފައި ވަނީ އެމްޓީސީސީ އާއި އެވެ.