"ހަވާ ފަޓާސްބަރިއެއް" ހެން ކުރިއަށް ގެންދިޔަ ކުރީގެ ރައީސް މުހައްމަދު ނަޝީދުގެ ޝަރީޢަތް ހިންގި 3 ފަނޑިޔާރުންގެ ބެންޗުގައި ގާޒީ އަބްދުލްބާރީ ޔޫސުފް ހިމެނިވަޑައިގަންނަވައެވެ. ހަމަ އެ ދުވަސްވަރު ކްރިމިނަލް ކޯޓުގައި ކުރީގެ ޑިފެންސް މިނިސްޓަރު ކާނަލް ނާޒިމްގެ ޝަރީޢަތް ހިންގި އިރު އެ މައްސަލަ ބެއްލެވި ބެންޗުގެ ރިޔާސަތުގައި ހުންނެވީ ވެސް ގާޒީ ބާރީއެވެ.
އޭގެ ދުވަސްކޮޅެއް ފަހުން އަދާލަތު ޕާޓީގެ ރައީސް ޝެއިޚް އިމްރާން އަބްދުﷲ ޖަލަށް ލުމަށް ހުކުމް ކުރެއްވީ ވެސް ގާޒީ ބާރީއެވެ. ކުރީގެ ނައިބު ރައީސް އަހްމަދް އަދީބުގެ ޝަރީޢަތްތައް ވެސް ކުރިއަށް ގެންދެވީ ހަމަ ގާޒީ ބާރީއެވެ.
ނަޝީދު އާއި ނާޒިމްގެ ޝަރީޢަތް ކުރިއަށް ގެންދެވި އިރު ގާޒީ ބާރީގެ ފަރާތްޕުޅުން ފެނިވަޑައިގެންނެވި ހަރުކަށި ކަމާއި ޝަރީޢަތުގެ މަޖިލީހުގައި އެބޭފުޅާގެ ބަސްމަގު ހުންނެވި ގޮތާއި މެދު އެތައް ބަޔަކު ކަންބޮޑުވުން ފާޅުކުރެއްވިއެވެ. ބައެއް ފަހަރަށް ވަރުގަދަ ސުވާލުތައް ކުރިމަތި ކުރުވި އިރު، ސޯޝަލް މީޑިޔާގައި ދެކެވޭ ވާހަކަތާއި ގުޅިގެން ދިފާއީ ވަކީލުންނަށް އިންޒާރުތައް ދެއްވިއެވެ.
މީގެ އިތުރުން އަދާލަތު ޕާޓީގެ ރައީސް ޝެއިޚް އިމްރާން އަބްދުﷲގެ ޝަރީޢަތް ފެށުމާއި އެކު ގާޒީ ބާރީ އިއުލާންކުރެއްވީ ގޮތެއް ނިންމަވައިގެން ހުންނެވި ވާހަކައެވެ. ނަޝީދާއި ނާޒިމްގެ ޝަރީޢަތާއި އެއްގޮތަށް އިމްރާންގެ ޝަރީޢަތުގައި ވެސް ދިފާޢީ ހެކި ހުށަހެޅުމުގެ ފުރުސަތު ހަނިކުރިއެވެ. ކުރީގެ ނައިބު ރައީސް އަހްމަދު އަދީބުގެ މައްޗަށް ކުރިއަށް ގެންދިޔަ ޝަރީޢަތުގައި ވެސް ގާޒީ ބާރީގެ ފަރާތްޕުޅުން ހަރުކަށިކަމާއި ތަފާތު ކަންތައް ފެނިގެން ދިޔައެވެ.
މި ހުރިހާ ސަބަބަކަށްޓަކައި ރާއްޖޭގެ ރައްޔިތުންގެ ތެރެއިން ގިނަ ބަޔަކު ގެންދިޔައީ، އެ ޝަރީޢަތްތަކާއި މެދު ސުވާލު އުފައްދަމުންނެވެ. އެ ސުވާލުތަކަށް ޖަވާބު ދެމުން ސަރުކާރުން ވެސް ބުނަމުން ދިޔައީ، ކޯޓުތަކުން ނިންމާ ނިންމުންތަކަށް އިހްތިރާމް ކުރާނެ ވާހަކައެވެ. މާނައަކީ، މަތީ މަރްޙަލާގެ ކޯޓަކުން އެ ހުކުމްތައް ބާތިލްކޮށްފި ނަމަ އެކަމަށް އިހްތިރާމްކުރާނެ ވާހަކައެވެ.
1 ފެބްރުއަރީ 2018ގައި ސުޕްރީމް ކޯޓުން ހުކުމް ކުރީ ރައީސް ނަޝީދު، ކާނަލް ނާޒިމް، ޝެއިޚް އިމްރާން އަދި އަދީބުގެ މައްޗަށް އިއްވި ހުކުމް ބާތިލް ކަމަށާއި އެބޭފުޅުން ވަގުތުން މިނިވަން ކުރުމަށެވެ. އެހެނަސް ސަރުކާރުން އެހުކުމަށް ތަބާނުވިއެވެ. އެއީ "ރިޝްވަތު ދީގެން ކުރި ހުކުމެއް" ކަމަށް ސަރުކާރުން ސިފަކުރެއެވެ.
ފާހަގަކޮށްލަން ޖެހޭ ކަމަކީ ސުޕްރީމް ކޯޓުން 1 ފެބްރުއަރީގައި ނެރުނު ހުކުމާއި ދެކޮޅު ނުހެދުމަށް ފާޅުގައި ގޮވާލެއްވި އެއްބޭފުޅަކީ ކްރިމިނަލް ކޯޓުގެ ކުރީގެ ގާޒީ އަބްދުލްބާރީ ޔޫސުފެވެ. ބާރީގެ އިތުރުން ރާއްޖޭގެ އެއްވެސް ކޯޓެއްގެ ފަނޑިޔާރަކު ނުވަތަ ގާޒީ އަކު ވެސް މިފަދައިން ގޮވާލާފައެއް ނުވެއެވެ.
ބާރީގެ ފޭސްބުކް ޕޭޖްގައި ލިޔުއްވާފައިވާ ގޮތުން ޝަރުއީ ކޯޓެއްގެ އަމުރުތަކާއި ހުކުމްތައް ތަންފީޒުކުރުމުގައި ބަލަންޖެހޭނީ އެ ހުކުމްތަކާއި އަމުރުތަކުގެ ބޭރު ފުށަށް ކަމަށާއި ދަށު ކޯޓުތަކުގެ ހުކުމްތަކާ އަމުރުތަކާމެދު ހިތްހަމަނުޖެހޭނަމަ އިސްތިއުނާފު ކޮށްގެން އެއާ މެދު ވާހަކަ ދެއްކިދާނެ ކަމަށެވެ.
އަދި މީގެ އިތުރުން ސްޕްރީމް ކޯޓުގެ ހުކުމްތަކާއި އަމުރުތަކަށް ޖަދަލު ނުކުރެވޭނެ ކަމަށާއި އެއީ އެއްވެސް ޝަހުސަކަށް ކުރެވޭނެ ކަމެއް ނޫންކަމަށް ވެސް ބާރީ ވަނީ ވިދާޅުވެފައެވެ.
ސުޕްރީމް ކޯޓުގެ އަމުރު ތަންފީޒު ކުރުމަށް ގާޒީ ބާރީ ތާއީދުކުރައްވާ ނަމަ އޭގެ މާނަ އަކީ، ރައީސް ނަޝީދު، ކާނަލް ނާޒިމް، ޝެއިޚް އިމްރާން އާއި ކުރީގެ ނައިބު ރައީސް އަދީބުގެ މައްޗަށް ޝަރީޢަތް ކުރިއަށް ގެންދެވުނީ ބޭއިންސާފުން ކަން އެބޭފުޅާ އެއްބަސްވެވަޑައިގަތުމެވެ. މައްސަލަ ބެއްލެވި ގާޒީ، ހުކުމް ގޯސްކަމަށް ވިދާޅުވީމާ ދެން އެ ހުކުމް ސައްޙަ ކަމަށް ބެލެވޭނެ ހެއްޔެވެ؟
ރައީސް ނަޝީދާއި ކާނަލް ނާޒިމްގެ މައްޗަށް ހުކުމް އިއްވި ގާޒީންގެ ބެންޗުގައި ހިމެނިވަޑައިގެންނެވި ގާޒީ ބާރީ އެ ހުކުމް ބާތިލްކުރުމަށް ތާއީދު ކުރައްވާ ނަމަ އެއީ ތޯތޯ ވާހަކައެއް ކަމުގައި ބެލެވޭކަށް ނެތެވެ. އަދި އެބޭފުޅުން މިނިވަން ނުކޮށް ބޭތިއްބުމަކީ ވެސް ބޭއިންސާފެއް ނޫން ހެއްޔެވެ؟
ޝެއިޚް އިމްރާންގެ ޝަރީޢަތް ފެށުމުގެ ކުރިން ގޮތެއް ނިންމަވައިގެން ހުންނަވައި ޝަރީޢަތް ކުރިއަށް ގެންދަވައި އިމްރާން ޖަލަށް ލުމަށް ހުކުމް ކުރުމަށް ފަހު އޭގެ 2 އަހަރު ފަހުން އެ ހުކުމް ގޯށް ކަމަށް ގާޒީ ވިދާޅުވުމުން ދެން އެބޭފުޅާ މިނިވަން ނުކޮށް އިތުރަށް ދައްކާނެ ހުއްޖަތެއް އެބައޮތް ހެއްޔެވެ؟
ޝަރީޢަތަކީ ބޭރުފުށަށް ހިނގާ އެއްޗެކެވެ. އޭގެ މާނައަކީ، މީސްމީހުންގެ ސިއްރުތަކަކީ، އިންސާނުނަށް އެނގޭނެ ކަމެއް ނޫން ކަމެވެ.
ރައީސް ނަޝީދާއި ކާނަލް ނާޒިމް، ޝެއިޚް އިމްރާން އަދި ކުރީގެ ނައިބު ރައީސް އަދީބުގެ ޝަރީޢަތުން ބޭރުފުށުން ފެންނަން ހުރި ކަންތަކަށް ބަލާލުމުން ފެންނަނީ، ޤާނޫނީ ނިޒާމުގެ އުސޫލުތަކާއި ޚިލާފަށް ކުރިއަށް ގެންދިޔަ ކަމެވެ. އަދި މިހާރު ގާޒީ ބާރީ އެ ހުކުމްތައް ބާތިލްކުރުމަށް ތާއީދު ކުރެއްވުމުން ޝަރީޢަތުގެ "އެތެރެފުށުގައި" ވެސް ގޯސްތަކެއް ހުރިކަން ހާމަވީއެވެ.