ވިލިނގިލީ ދާއިރާގެ މެންބަރު ސައުދު ހުސައިން "ކުދި ކުދި" ކޮށްލާނެ ކަމަށް ވިދާޅުވެ ޔޫތު މިނިސްޓްރީގެ ކޯޑިނޭޓަރު އިބްރާހީމް ރަޝީދު ވަރުގަދަ އިންޒާރެއް ދެއްވައިފިއެވެ.
ކޯޑިނޭޓަރު އިބްރާހިމް މި އިންޒާރު ދެއްވާފައި ވަނީ، ގއ.ވިލިނގިލީގައި ޕީޕީއެމްގެ ރައީސް ޔާމީން ފެކްޝަނުން ބޭއްވި "ވިދި ވިދި އޮޓެ އޮޓެ" ޖަލްސާގައި ވާހަކަ ދައްކަވަމުންނެވެ.
އެ ޖަލްސާގައި ކޯޑިނޭޓަރު އިބްރާހިމް ވާހަކަ ދައްކަވަމުން ސައުދަށް އިންޒާރު ރައީސް ޔާމީން ކުރިމަތިލައްވައިފިނަމަ އެމަނިކުފާނާ ވާދަކޮށް، އެމަނިކުފާނު ބަލި ކުރާނެ ކަމަށް ސައުދު ވިދާޅުވެފައިވާތީ އެކަމަށް ރައްދު ދެއްވަމުންނެވެ.
ކޯޑިނޭޓަރު އިބްރާހީމް، ސައުދަށް އިންޒާރު ދިނުމުގެ ކުރިން އިންޒާރެއް ދެއްވަން ބޭނުންވާ ކަމަށް ވަރަށް ސާފުކޮށް ވިދާޅުވިއެވެ.
ހުވަދޫ ބަހުން ވާހަކަދައްކަވަމުން އިބްރާހީމް ރަޝީދު ވިދާޅުވީ ސައުދު ނުސީދާ ގޮތަކަށް ބަލާލިޔަސް އޭނާ "ކުދި ކުދި"ކޮށްލާނެ ކަމަށެވެ.
"ކިރިޔާ ނުސީދާ ގޮތަކަށް ބަލައިލިޔަސް އޮޓެ އޮޓެ ވިދި ވިދި ކެރެފައި ވިދި ވިދި ކެރެންނޭކަން ނިކަން ރަނގަޅާ ހަނދާން ކެރަންނައިތި،" ސައުދަށް އިންޒާރު ދެއްވަމުން އިބްރާހީމް ރަޝީދު ވިދާޅުވި އެވެ.
ކޯޑިނޭޓަރު އިބްރާހިމް ވިދާޅުވި ގޮތުގައި މެންބަރު ސައުދު އުޅުއްވަނީ "ސައިޒު" އޮޅިވަޑައިގެންނެވެ.
ވިދި ވިދި އާއި އޮޓެ އޮޓެ އަކީ އެއްޗެއް ކުދިކުދި ކޮށްލާނެ ކަމަށް ބުނުމުގެ ގޮތުން ހުވަދޫ ބަހުރުވައިގައި ބޭނުންކުރާ ބަސްތަކެކެވެ.