އޮންލައިން ނޫހަކަށް ދިން އިންޓަވިއުއެއްގައި، އަހަރެއްގެ ތެރޭގައި އައްޑޫން އެމްޑީޕީ ފޮހެވިގެންދާނެ ކަމަށް އައްޑޫ ސިޓީ ހުޅުދޫ ދާއިރާގެ މަޖިލިސް މެންބަރު މުހައްމަދު ޝާހިދު (ޝާޑު) ވިދާޅުވެފައި ވަނީ މީގެ 4 އަހަރުކުރިން، 2014 ވަނަ އަހަރުގެ މާޗް މަހުގެ 24 ވަނަ ދުވަހުއެވެ.
އެ އިންޓަވިއު ޝާޑު ދެއްވާފައި ވަނީ، ރައްޔިތުންގެ މަޖިލީހުގެ ހުޅުދޫ ދާއިރާގެ އިންތިޚާބު ކާމިޔާބު ކުރިތާ ކުޑަ ދުވަސްކޮޅެއްގެ ތެރޭގައެވެ.
އޮންލައިން ނޫހެއް ކަމަށްވާ 'އެމްވީޔޫތް' އަށް ދިން އިންޓަވިއުގައި ޝާޑު ވިދާޅުވެފައި ވަނީ ކުރިއަށް އޮތް އަހަރުގެ ތެރޭގައި އައްޑޫން އެމްޑީޕީ ފޮހެވިގެން ގޮސް، ހުރިހާ ރައްޔިތުން ޕީޕީއެމްއަށް ސޮއި ކުރާނެ ކަމަށެވެ.
"2014 ވަނަ އަހަރުގެ މާޗް 24 ވަނަ ދުވަހު ޝާޑް ވިދާޅުވެފައި ވަނީ ކުރިއަށް އޮތް އަހަރުގެ ތެރޭގައި އައްޑޫން އެމްޑީޕީ ފޮހެވިގެން ގޮސް، ހުރިހާ ރައްޔިތުން ޕީޕީއެމްއަށް ސޮއި ކުރާނެ ކަމަށެވެ."
ޝާޑު އޭރު ވިދާޅުވެފައިވާ ގޮތުގައި އައްޑޫގެ ތަރައްޤީއަށް ކުރަންޖެހޭ ހުރިހާ ކަމެއް ކުރުމަށް އެބޭފުޅާ ސަރުކާރަށް އެއްބާރުލުން ދެއްވާނެއެވެ.
މީގެ އިތުރުން އެމްޑީޕީގެ ކެންޑިޑޭޓުން ހޮވުމަށް އެޕާޓީގެ މެންބަރުން މަސައްކަތް ކުރީ "ނާޖާއިޒް ފައިދާ ލިބޭނެ ކަމަށް އުއްމީދުކޮށްގެން" ކަމަށް ޝާޑު ވިދާޅުވިއެވެ.
މީގެ ހަތަރު އަހަރު ކުރިން ދެއްވި އިންޓަވިއުގައި ޝާޑު ވިދާޅުވެފައި ވަނީ ރައީސް ޔާމީންގެ ސަރުކާރަކީ ވަަރަށް ވަރުގަދަ، މެގަ ޕްރޮޖެކްޓްތައް ހިންގާނެ ސަރުކާރެއް ކަން އެމްޑީޕީ މެންބަރުންނަށް ވެސް އެނގޭނެ ކަމަށެވެ.