ގުޅިފައިވާ ސިޔާސީ ޕާޓީތަކުން ފަށާފައިވާ މަސައްކަތަށް ކާމިޔާބު ލިބޭނެ ކަމަށާއި އަދި މަދު ދުވަސްކޮޅެއްގެ ތެރޭގައި ކުރިމަތިވެފައިވާ "މުސީބާތުން" ސަލާމަތްވާނެ ކަމުގެ ފުރިހަމަ ޔަގީންކަމާ އުންމީދު އެބައޮތް ކަމަށް އެމްޑީޕީގެ ނައިބް ރައީސް މުހައްމަދު ޝިފާޒު ވިދާޅުވެއްޖެއެވެ.
އެމްޑީޕީ ހަރުގެ ކުރިމަތީގައި ބޭއްވި ޖަލްސާގައި ވާހަކަ ދައްކަވަމުން "މުސީބާތެއް" ކަމުގައި ސިފަކުރެއްވީ ރައީސް އަބްދުﷲ ޔާމީންގެ ވެރިކަން ކަމަށް ބެލެވެއެވެ.
"އިރާދަކުރެއްވިއްޔާ މަދު ދުވަސްކޮޅެއް ތެރޭ މި މުސީބާތުން އަޅުގަނޑުމެން މިރާއްޖެ ސަލާމަތް ކުރާނަން. އިރާދަ ކުރެއްވިއްޔާ އެކަމުގެ ފުރިހަމަ ޔަގީންކަމާ އުންމީދު އަޅުގަނޑުމެން އެބައޮތް"، ޝިފާޒު ވިދާޅުވިއެވެ.
ޝިފާޒު ވިދާޅުވި ގޮތުގައި ސަލާމަތީ ޚިދުމަތްތަކުން ރައީސް އަބްދުﷲ ޔާމީންގެ "އަނިޔާއަށް ތާއީދުކޮށްގެން އެކަމަށް ހިތްވަރު ދީގެން" އަބަދު ނުތިބޭނެ ކަމަށެވެ.