އައްޑޫ ސިޓީ ހިތަދޫގައި ހިމާޔަތްކޮށްފައިވާ ކޯއްޓޭ ސަރަހައްދުގައި ކަނޑޫފާ ނާސަރީއެއް ހުޅުވައިފިއެވެ.
ކަނޑޫފާ ނާސަރީ ހުޅުވާފައިވަނީ އެންވަޔަރަންމަންޓް މިނިސްޓްރީން ހިންގާ ކްލައިމެޓް ޗޭންޖު އެޑެޕްޓޭޝަން ޕްރޮޖެކްޓް (ސީކެޕް) ގެ ފަރާތުންނެވެ. ނާސަރީ ހުޅުވައިދިނީ އައްޑޫ ހައިސްކޫލާއި، ނޫރާނީ ސްކޫލުގެ ދަރިވަރުންނެވެ.
މި ނާސަރީ ހުޅުވާފައިވަނީ އައްޑޫގައި ކުރިއަށް ގެންދިޔައ އާތް އަވަރ މޯލްޑިވްސް ޙަރަކާތްތަކުގެ ތެރެއިން އައްޑޫގައި ކުޅި، ފާ އަދި ޗަސްބިންތަކުން މަދުވަމުންދާ ގަސް އާލާކުރުމުގެ ބޭނުމުގައެވެ.
ކޯއްޓޭ ހިމާޔަތް ކުރެވިފައިވާ ޞަރަޙައްދުގައި މެންގްރޫވް ނުވަތަ ކަނޑޫފާ ނާސަރީ ހުޅުވާފައި ވާއިރު، މިހާރު އައްޑޫން ފެންނަން ހުރި ތިން ބާވަތެއްގެ ކަނޑޫފާ ގަސް ވަނީ އިންދާފައެެވެ. އެއީ ބުރެވިއާއި،ރަންޑި އަދި ކަރަމަނައެވެ.
ސީކެޕް އައްޑޫ ޕްރޮޖެކްޓް އޭރިއާ މެނޭޖަރ، އާމިނަތު އަފާއު ވިދާޅުވީ މިފަދަ ނާސަރީއެއް ޤާއިމުކުރުމުގެ ބޭނުމަކީ ރާއްޖެއިން ފެންނަން ހުރި ކަނަޑޫފާގެ ބާއްވަތްތަށް ދައްކާ އެ ބާއްވަތްތަކުގެ މުހިންމު ކަމާއި އަދި އޭގެ ފައިދާ އެތަނަށް ޒިޔާރަތް ކުރާ ފަތުރުވެރިންނާއި، ސްކޫލު ކުދިންނަށް ކިޔައިދިނުން ކަމުގައެވެ.
އަފާއު ވިދާޅުވީ، ޗަސްބިންތަކުން މަދުވަމުންދާ ގަސް އާލާކުރުމަށް މިހުޅުވި ކަނޑޫފާއަށް ޙާއްޞަ ނާސަރީ އަކީ ރާއްޖޭގައި ޤާއިމުކުރި އެފަދަ ފުރަތަމަ ނާސަރީ ކަމަށެވެ.