ޕީޕީއެމްގެ "ރުމާލު 2" ޖަގަހައިގައި ރޯކޮށްލާފައި ވަނީ ޕީޕީއެމުން އަމިއްލަ އަށް ކަމަށް ވެދާނެ ކަމަށް ޖުމްހޫރީ ޕާޓީން ބުނެފިއެވެ.
ޖޭޕީގެ ސްޕޯކްޕާސަން އަލީ ސޯލިހް ވިދާޅުވީ، "ރުމާލު2" ޖަގަހައިގައި އަމިއްލައަށް ވެސް ރޯކޮށްލައިފާނެ ކަމަށާއި އެހެންވެ އެއީ ވަރަށް ރަނގަޅަށް ތަހުގީގު ކުރަން ޖެހޭ މައްސަލައެއް ކަމަށެވެ.
"ރުމާލު2" ޖަގަހަ އަށް ރޭ ދަންވަރު ވަގުތެއްގައި މީހަކު ވަދެ އެ ޖަގަހައިގެ ސްޓޭޖަށް ޕެޓްރޯލް އަޅައި ރޯކޮށްލުމުގެ ސަބަބުން ސްޓޭޖާއި ޕޯޑިއަމްގެ އިތުރުން މޭޒެއް ވަނީ ބޭނުން ނުކުރެވޭ ވަރަށް އަނދައިފަ އެވެ.
އަލީ ސޯލިހް އާއި ހަވާލާދީ "މިހާރު" ނޫހުގައި ރިޕޯޓްކޮށްފައިވާ ގޮތުގައި ބޭރުގެ ވަފްދުތައް ރާއްޖެ އަންނަމުންދާ ދަނޑިވަޅެއްގައި މިފަދަ ހާދިސާއެއް ހިނގުމަކީ އިދިކޮޅު ފަރާތްތަކުގެ ބޮލުގައި އަޅުވަން ޕީޕީއެމުން ކުރި ކަމަކަށް ވެދާނެ ކަމަށެވެ.
"ކިހިނެއްތޯ 24 ގަޑިއިރު ސެކިއުރިޓީ ބަލަހައްޓާ ތަނެއްގެ ސްޓޭޖުގައި އަޅައިފަ އޮތް ކާޕެޓުގައި ހަމަ ހުރެފައި ރޯވާނީ. މި މައްސަލަ ރަނގަޅަށް ބަލަން ޖެހޭ،" އަލީ ސޯލިހް ވިދާޅުވި އެވެ.