ހެލްތް މިނިސްޓްރީން ދިހަ ރަށަކަށް ޖިމް އިކުއިޕްމަންޓް ހަވާލުކޮށްފި އެވެ.
ހެލްތް މިނިސްޓްރީގައި މިއަދު ބޭއްވި ޚާއްސަ ރަސްމިއްޔާތެއްގައި ތަކެތި ހަވާލުކޮށްދީފައިވަނީ ށ. ފުނަދޫއާއި ރ. ދުވާފަރާއި ޅ. ހިންނަވަރާއި ދ. ކުޑަހުވަދޫއާއި ސ.ހުޅުދޫއާއި ނ.ކެނދިކުޅުދޫއާއި ހއ. ކެލާ އާއި ތ. މަޑިފުއްޓާއި ގދ. ފިޔޯރީގެ އިތުރުން ލ. ފޮނަދޫ އާއި އެވެ.
މި ދިހަ ރަށުގެ ތެރެއިން އައުޓް ޑޯ ޖިމް ސާމާނު ހަވާލު ކޮށްފައިވަނީ އަށް ކައުންސިލްގެ އިތުރުން ދެ ރަށެއްގެ ސިއްޙީ ޚިދުމަތް ފޯރުކޮށްދޭ މަރުކަޒަށެވެ. އެގޮތުން ދ. ކުޑަހުވަދޫ އާއި ނ. ކެނދިކުޅުދޫގެ އައުޓް ޑޯ ޖިމް ހިންގުން ހަވާލުކޮށްފައިވަނީ އެރަށުގެ ސިއްޙީ ޚިދުމަތް ފޯރުކޮށްދޭ މަރުކަޒަށެވެ.
މި ރަސްމިއްޔާތިގައި ވާހަކަ ދައްކަވަމުން ހެލްތު މިނިސްޓަރު އަބްދުﷲ ނާޒިމް ވިދާޅުވީ، ރާއްޖޭގައި ގައިން ގަޔަށް ނާރާ ބޮޑެތި ބަލިތައް އިންތިހާއަށް އިތުރުވެފައިވާ ކަމަށާއި މިފަދަ ބަލިތަކުން ސަލާމަތްވުމަށް ރަނގަޅު ލައިފްސްޓައިލެއް ގެންގުޅުން މުހިއްމު ކަމަށެވެ. އަދި ރަގަޅު އާދަތައް މީހުންގައިގާ އަށަގެންނެވުމަށް ކަސްރަތަކީ ވަރަށް މުހިއްމު ރޯލެއް އަދާކުރާ ބައެއް ކަމަށާއި މިގޮތަށް މި ދިހަ ރަށުގައި ވެސް އެފަދަ އާދަތައް އަށަގެންނެވުމަކީ އެންމެ ބޮޑު އުންމިދު ކަމަށް ވެސް މިނިސްޓަރު ވިދާޅުވި އެވެ.
"ދިވެހި ރާއްޖޭގެ ހާލަތު އޮތީކީ ގައިންގަޔަށް ނާރާ ބަލިތަކަށް ބަލާ އިރު ރަގަޅަކަށް ނޫން ކަމަށާއި، މީހުން ކަސްރަތު ކުރުމަށާއި ކާންބޯ ގެންގުޅޭ ތަކެތި، އެއީ އެންމެ ރަގަޅު ތަކެތިތޯ އަބަދު ވެސް ސުވާލު އުފައްދާ ކަމަށް މިނިސްޓަރު ނާޒިމް ވިދާޅުވި އެވެ.
މިނިސްޓަރު އިތުރަށް ވިދާޅުވީ ދުޅަހެޔޮ ސިއްހަތެއްގައި ހުރުމަށް ފަރުދީ ފެންވަރުގައި ކުރެވޭނެ ކަންކަމަކީ ވަރަށް މުހިއްމު ކަންކަން ކަމަށާއި މިއަދު ޖިމްތަކެއް ހަވާލުކޮށްގެން މިފެށިގެން ދިޔައީ އެފަދަ މަސައްކަތެއް ކަމަށެވެ.
ދިހަ ޖިމް އަށް ބޭނުންވާ ސާމާނު ހަދިޔާ ކޮށްފައިވަނީ ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިންނެވެ. ދުނިޔޭގެ ސިއްހަތު ޖަމިއްޔާގެ ފަރާތުން ރާއްޖެއާ ހަވާލުވެ ހުންނެވި ޑރ. އަރްވިންދު މާތޫރު ވިދާޅުވީ، ކަސްރަތު ކުރުން ފަދަކަންކަމަށް މީހުން މިހާރަށް ވުރެ ބޮޑަށް އަހުލުވެރި ކުރުމަކީ ސިއްހަތު ޖަމިއްޔާގެ ވަރަށް މުހިއްމު މަސައްކަތެއް ކަމަށާއި މިފަދަ ކަމެއް ކުރުމުގައި ހެލްތް މިނިސްޓްރީގެ މަސައްކަތްތަކަކީ ފާހަގަ ކޮށްލަންޖެހޭ މަސައްކަތްތަކެއް ކަމަށެވެ.
ޖިމްތައް ރަށްރަށުގައި ޤާއިމް ކުރުމުގެ މަސައްކަތް ހަވާލުކޮށްފައިވަނީ ސްޕޯޓްސް ކޯޕަރޭޝަންއާއި އެވެ. އެކޯޕަރޭޝަނުން ބުނީ 10 ރަށުގައި އައުޓް ޑޯ ޖިމްގެ މަސައްކަތް ކުރިއަށް އޮތް ހަތަރު މަސް ދުވަހުގެ ތެރޭގައި ނިންމާލެވޭނެ ކަމަށެވެ.