ދުންފަތުގެ އިސްތިޢުމާލުކުރުން ހުއްޓާލަން ބޭނުންވާ ފަރާތްތަކަށް އެހީތެރިކަން ފޯރުކޮށްދިނުމަށް އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗު)ގައި ސްމޯކިންގ ސެސޭޝަން ކްލިނިކެއްގެ ޚިދުމަތް އަންނަ މަހު ދޭން ފަށާނެ ކަމަށް އެ ހޮސްޕިޓަލުން ބުނެފިއެވެ.
އައިޖީއެމްއެޗުގެ ސީއީއޯ ބްރިގޭޑިއަރ ޖެނެރަލް ފަރުޙަތު ޝަޙީރު އާއި ހަވާލާދީ ޕީއެސްއެމް އިން ރިޕޯޓްކުރާ ގޮތުގައި ދުންފަތުގެ އިސްތިޢުމާލުކުރުން ހުއްޓާލަން ބޭނުންވާ މީހުންނަށް އެހީތެރިކަން ފޯރުކޮށްދިނުމަށް ޤާއިމުކުރާ މިކްލިނިކް އަންނަ މަހުގެ ހަތްވަނަ ދުވަހު ހުޅުވުމަށް ވަނީ ހަމަޖެހިފަ އެވެ. އަދި އެކަމުގެ ތައްޔާރީތައް ކުރަމުން އަންނަ ކަމަށާއި ސްމޯކިންގ ސެސޭޝަން ކްލިނިކު ހުޅުވުމުން އެކަމުގެ ފައިދާ ޢާންމުންނަށް ލިބޭނެ ކަމަށްވެސް ފަރުޙަތު ވިދާޅުވި އެވެ.
މީގެ އިތުރުން ފަރުޙަތު ވިދާޅުވީ މި ޚިދުމަތް ދެނީ އިން ޕޭޝަންޓުންނާއ، އައުޓް ޕޭޝަންޓުންނާއި، އަދި ޚާއްސަކޮށް އައިޖީއެމްއެޗުގައި މަސައްކަތްކުރާ މުވައްޒަފުންގެ ތެރެއިން ސިނގިރޭޓް ނުވަތަ ދުންފަތުގެ އިސްތިޢުމާލުކުރާ ބޭފުޅުން، އެބޭފުޅުން އެކަމުން ދުރަށް ދިއުމަށް އެހީތެރިވެދިނުމުގެ ނިޔަތުގައި ކަމަށެވެ.
ފަރުޙަތު ވިދާޅުވީ އަންނަ އޭޕްރީލް މަހުގެ 7 ވަނަ ދުވަހު އެ ޚިދުމަތް ފޯރުކޮށްދޭން ފަށާނެ ކަމަށެވެ.
އައިޖީއެމްއެޗުގެ ރެސްޕިރޭޓަރީ މެޑިސިންގ ޑިޕާރޓްމަންޓުގެ ދަށުން ހިންގުމަށް ހަމަޖެހިފައިވާ މި ކްލިނިކް މެދުވެރިކޮށް، ދުންފަތުގެ އިސްތިޢުމާލުކުރުން ހުއްޓާލަން ބޭނުންވާ މީހުންނަށް ކައުންސެލިންގ ދިނުމާއި، ނިކޮޓިންގ ރިޕްލޭސްމަންޓް ތެރަޕީއާއި، ކޮންސަލްޓޭޝަންގެ ޚިދުމަތް ލިބެން ހުންނާނެ ކަމަށް އައިޖީއެމްއެޗުން ބުނެއެވެ.
އައިޖީއެމްއެޗުން ވަނީ ސްމޯކިންގ ސެސޭޝަން ކްލިނިކު ޤާއިމްކުރުމުގެ ގޮތުން އެކަމުގައި ޙަރަކާތްތެރިވާނެ ސިއްޙީ އެހީތެރިންވެސް ތަމްރީނުކޮށްފައެވެ.
އައިޖީއެމްއެޗުން ވަނީ ނޭވާލާ ނިޒާމުގެ ބަލިތަަކަށް ފަރުވާ ދިނުމަށްވެސް ޚާއްޞަ ޔުނިޓެއް ހުޅުވާ ޚިދުމަތްދޭން ފަށާފައެވެ.