ފުލުހެއްގެ މޫނުމަތީގައި ޖެހި މީހަކު 2 މަހާއި 12 ދުވަހަށް ޖަލަށް ލުމަށް ހުކުމްކޮށްފިއެވެ.
ފުލުހަކަށް ހަމަލާ ދީގެން ޖަލަށް ލުމަށް ހުކުމްކޮށްފައި ވަނީ ގ.ޝިރާޒް، މުހައްމަދު މަފާޒް ޙުސައިން ސަލީމެވެ.
މަފާޒު ޖަލަށް ލުމަށް ހުކުމްކުރީ، އޭނާ ދޫނިދޫ ކަސްޓޯޑިއަލްގައި ބަންދުކޮށްފައި ހުރި ގޮޅީގައި ތިބި ގައިދީންނަށް ކާއެއްޗެހި އަޅައި ދިނުމަށް ދިޔަ ފުލުސް މީހާގެ މޫނުމަތީގައި ޖެހިކަމަށް ޝަރީޢަތަށް ސާބިތުވުމުންނެވެ. މާޗް މަހުގެ 12 ވަނަ ދުވަހު ކްރިމިނަލް ކޯޓުން އިއްވި ހުކުމްގައި ބުނެފައިވާ ގޮތުގައި، މަފާޒް ވަނީ ފުލުސް މީހާގެ މޫނުމަތީގައި ޖެހިކަމަށް ޝަރީއަތުގެ މަޖިލީހުގައި އިއުތިރާފްވެފައެވެ.
ކްރިމިނަލް ކޯޓުގެ ހުކުމުން އެނގޭ ގޮތުގައި، ފުލުސް މީހާގެ މޫނުމަތީގައި މަފާޒް ޖެހީ ގޮޅީގައި ތިބި ގައިދީންނަށް ކާއެއްޗެހި އަޅައިދެމުން ދަނިކޮށް ގޮޅިތެރެއިން އަތް ދިއްކުރުމަށް ފަހުއެވެ.
މަފާޒްގެ މައްޗަށް ދައުލަތުން އުފުލާފައި ވަނީ ޤާނޫނުލް އުޤޫބާތުގެ 120 ވަނަ މާއްދާގެ (ހ)ގެ 1 ވަނަ ނަންބަރުގެ ދަށުން އަނިޔާއެއް ދިނުމުގެ ކުށުގެ ދައުވާއެވެ.