މިދިޔަ މަހު ރިލީޒް ކުރި އަނުޝްކާ ޝަރްމާގެ ބިރުވެރި ފިލްމް "ޕަރީ" ގެ ތަމަޅަ ވާޝަނެއް ހަދަން ނިންމައިފި އެވެ.
ނަމަވެސް ފިލްމާ ބެހޭ ތަފުސީލުތަކެއް އަދި ހާމައެއް ނުކުރެ އެވެ. ރިޕޯޓްތައް ބުނާ ގޮތުން ފިލްމްގެ ކާސްޓާއި ޑައިރެކްޓަރު ވަރަށް އަވަހަށް އިއުލާން ކުރާނެ އެވެ.
އިންޑިއާގައި އާންމުކޮށް ހަދާ ބިރުވެރި ފިލްމްތަކަށް ތަފާތެއް ގެނުވައި ދިން ކަމަށް ގިނަ ބަޔަކު ގަބޫލު ކުރާ "ޕަރީ" އަކީ ޕްރޮސިތު ރޯއި ޑައިރެކްޓް ކުރި ފިލްމެކެވެ. ފިލްމްގެ ކާސްޓުންގެ ތެރޭގައި ޕަރަމްބްރަޓާ ޗެޓަޖީ، ރަޖަތު ކަޕޫރް އަދި ރިއާ ޗަކްރަބަތީ ހިމެނެ އެވެ.
"ޕަރީ" އަކީ އަނުޝްކާގެ ފިލްމް ކުންފުނި ކްލީން ސްލޭޓް ފިލްމްސް އިން ޕްރޮޑިއުސް ކުރި ފިލްމެކެވެ. އެކަމަކު ފިލްމަށް ބޮކްސް އޮފީހުގައި އުންމީދު ކުރި ވަރުގެ ތަރުހީބެއް ނުލިބެ އެވެ.
ނަމަވެސް ފިލްމަކީ ޝައުގުވެރި އަދި ހަމަ ހަގީގަތުގައި ބިރު ގަންނަ ކަހަލަ ފިލްމެއް ކަމަށް "ޕަރީ" ބެލި ބައެއް މީހުން ބުންޏެވެ.