އައްޑޫ ސިޓީ، ހިތަދޫ ޒުވާނުންގެ ތެރޭގައި ފެންވަރު ރަނގަޅު ޖިމަކަށް އެދިއެދި ތިބި ޒުވާނުން ވަރަށް ގިނައެވެ. އެހެން ނަމަވެސް ރައީސް ޔާމީންގެ ވެރިކަމުގެ ދައުރުގެ ފަހު ދުވަސްތައް ގުނަމުން ދާއިރު އަދިވެސް ޖިމެއް ގާއިމްކޮށް ނުދެވެއެވެ.
"ސަރުކާރުން ހިތަދޫގައި ޖިމެއް ހަދަން ހާއްސަ އިސްކަމެއް ދީގެން މަސައްކަތް ކުރަމުން އަންނަ" ކަމަށް ބުންޏަސް އެ ފަދަ މަސައްކަތެއް ކުރާ ތަނެއް ނުފެނެއެވެ.
ޖިމާއި ބެހޭގޮތުން ހިތަދޫ ޒުވާނުންނަށް ފާއިތުވި 4 އަހަރު ދުވަހުގެ ތެރޭގައި ކިރިޔާ ވެސް ހިތްހަމަޖެހުމެއް ލިބުނީ ޖިމް އިކުއިޕްމަންޓް ހޯދަން 2016 ވަނަ އަހަރުގެ ޖުލައި މަހުގެ ތެރޭގައި އިއުލާން ކުރުމުންނެވެ. އެހެން ނަމަވެސް އެއިއުލާނެއް ކުރިތާ 2 އަހަރުވާން ކައިރިވާ އިރު ވެސް ޖިމް ޤާއިމްކުރުމާއި ބެހޭގޮތުން އެއްވެސް ޚަބަރެއް ނުވެއެވެ.
ޔޫތް މިނިސްޓްރީގެ 2 ކޯޑިނެޓަރަކު އައްޑޫގައި ތިބޭއިރު، އަދިވެސް ބުނަމުންދަނީ ހަމަ ޖިމް ވެސް ހަމަ "ޔަޤީން" ވާހަކައެވެ. އެކަމުގެ ތަފްސީލަށް ދާން އެމީހުން އިންކާރު ކުރާ ކަމަށް ހިތަދޫގެ ޒުވާނުން ބުނެއެވެ.
'އައްޑޫލައިވް' އަށް އެނގިފައިވާ ގޮތުގައި ފެބްރުއަރީ މަހުގެ ތެރޭގައި ފަސްޓް ލޭޑީ ފާތިމަތު އިބްރާހީމް އައްޑޫ އަށް ކުރެއްވި ދަތުރުފުޅުގައި ހިތަދޫ ޒުވާނުންގެ ޝަކުވާތަކަށް އަވަސް ހައްލެއް ގެނެސްދެއްވާނެ ކަމަށް އެކަމަނާ ވިދާޅުވިއެވެ.
ޕީޕީއެމްގެ ހިތަދޫ ގޮފީގައި އިސްކޮށް ހަރަކާތްތެރިވާ ޒުވާނަކު ބުނިގޮތުގައި، ހިތަދޫގައި ޖިމް ހެދުމާއި ބެހޭގޮތުން ފަސްޓް ލޭޑީ ފާތިމަތު އިބްރާހީމާއި ޒުވާނުން ބައްދަލުކޮށްފައިވާ ކަމަށެވެ. އަދި ޖިމް ޤާއިމްކޮށްދޭނެ ކަމުގެ ޔަޤީންކަން ފަސްޓް ލޭޑީ ދެއްވި ކަމަށެވެ.
އެހެން ނަމަވެސް ފަސްޓް ލޭޑީ އައްޑޫން ފުރާވަޑައިގެންނެވި ފަހުން، މަސް ދުވަސް ފާއިތުވެގެން ދާއިރު ވެސް ޖިމާއި ގުޅޭ އުފާވެރި ޚަބަރެއް ހިތަދޫގެ ޒުވާނުންނަކަށް ނުލިބުނެވެ.
ސުވާލަކީ، ރައީސް ޔާމީންގެ ދައުރު ނިމެން ބާކީ އޮތް، މަދު ދުވަސްކޮޅުގެ ތެރޭގައި ހިތަދޫގައި ޒުވާނުނަށް ޖިމެއް ޤާއިމްކޮށްދެވި ދާނެ ހެއްޔެވެ؟ ނުވަތަ ޖިމް ވެސް އައްޑޫގައި ޤާއިމްކުރަން ބުނި އައިޓީ ޕާކުގެ ވައުދެކޭ އެއްގޮތަށް ހަނދާނުން ކައްސާލީ ހެއްޔެވެ؟