ގައުމީ ޓީމުގެ ވައިސް ކެޕްޓަން އައްސަދު އަލީ(އަޑުބަރޭ) ގައުމީ ޓީމުން ރިޓަޔާކޮށްފިއެވެ.
އަޑުބަރޭ ރިޓަޔާ ކުރިކަން އިއުލާން ކުރި ނަމަވެސް ކޮށްފައިވަނީ ކޮން ސަބަބަކާ ލައިގެން ކަމެއް ހާމަކޮށްފައެއް ނުވެއެވެ.
އިދިކޮޅު ހަރަކާތްތަކުގައި ބައިވެރިވުމުގެ ސަބަބުން އެކި ފަހަރު މަތިން ފުލުހުންގެ ބެލުމުގެ ދަށަށް ވެސް ގެންގޮސްފައިވާ އަޑުބަރޭއަށް ވަނީ ސިޔާސީ ދާއިރާގައި ހަރަކާތްތެރިވުމުގެ ސަބަބުން ޕްރޮފެޝަނަލް ކެރިއަރަށް ބުރޫ އަރާފައެވެ.
އެގޮތުން މީގެ ކުރިން ދެ ފަހަރެއްގެ މަތިން އަޑުބަރޭ ވަނީ ގައުމީ ޓީމުންވެސް ސަސްޕެންޑު ކޮށްފައެވެ. އަދި އިތުރު އަދަބުތަކާ އޭނާ ވަނީ ކުރިމަތިލާން ޖެހިފައެވެ.
ފުރަތަމަ ފަހަރަށް އަޑުބަރޭ ހައްޔަރުކޮށްފައިވަނީ ކްރިމިނަލް ކޯޓުގެ ކުރީގެ އިސް ގާޒީ، އަބްދުލް ބާރީ ޔޫސުފްގެ ފޮޓޯ އެއް ނެގުމުގެ ސަބަބުންނެވެ. އަދި ދެވަނަ ފަހަރަށް އޭނާ ހައްޔަރުކުރީ އިދިކޮޅު ހަރަކާތެއްގެ ތެރެއިން، ފުލުހުންގެ ވާޖިބަށް ހުރަސް އެޅުމުގެ ތުހުމަތުގައި ކަމަށް މައުލޫމާތު ލިބިފައިވެއެވެ.