އައްޑޫ ލިންކް ރޯޑުގައި މިދިޔަ ޑިސެމްބަރު މަހުގެ 26 ވަނަ ދުވަހު ބާރު ސްޕީޑްގައި ދުއްވި އެންވަޔަރަމަންޓް މިނިސްޓްރީގެ ޕިކަޕް ޓްރަކަކުން ސައިކަލެއްގައި ޖެހި ހިނގި އެކްސިޑެންޓެއްގައި ގދ. ވާދޫ ނެސްޓް، އަރުޝަމް އިބްރާހިމް ނިޔާވިތާ މިއަދަށް 115 ދުވަސް ވީއެވެ.
އަރުޝަމްގެ އާއިލާ އާއި ރައްޓެހިން ފުން ހިތާމައެއްގައި ތިބި އިރު އެމީހުންގެ އިތުރުން ގިނަ ބަޔަކު ކުރަމުންދާ ސުވާލަކީ، އެ މައްސަލައިގައި އިންސާފު ޤާއިމްކޮށް ދެވިދާނެތޯއެވެ؟
އެކްސިޑެންޓް ހިނގާފައި ވަނީ ދައުލަތުގެ ވުޒާރާއެއްގެ ވެހިކަލަކުން ޖެހި ކަމަށް ވުމުން އެ މައްސަލަ ދެން ކުރިއަށް ނުދާނެ ކަމަށް ބައެއް މީހުން ދަނީ ބުނަމުންނެެވެ.
އެހެން ނަމަވެސް އެކްސިޑެންޓް ހިނގި ދުވަސްވަރު އާއިލާގެ މެންބަރުންނާއި ބައްދަލުކޮށް ފުލުހުން އެކްސިޑެންޓްގެ މައްސަލަ ރަނގަޅަށް ތަހުގީގް ކުރާނެ ކަމުގެ ޔަގީންކަން ދީފައިވާ ކަމަށް ވެއެވެ.
އަރުޝަމް ނިޔާވި އެކްސިޑެންޓް ހިިނގި އިރު ޕިކަޕް ދުއްވަން އިނީ އެންވަޔަރަމަންޓް މިނިސްޓްރީގެ ކްލައިމެޓް ޗޭންޖް އެޑަޕްޓޭޝަން ޕްރޮގްރާމް (ސީކެޕް) ގައި މަސައްކަތް ކުރާ މުވައްޒަފެކެވެ. އޭނާ އެކްސިޑެންޓް ހިނގިތާ ދުވަސްތަކެއް ފަހުން ފުލުހުންގެ ބެލުމުގެ ދަށަށް ގެންދިޔަ ނަމަވެސް ފަހުން ވަނީ ދޫކޮށްލާފައެވެ.
އެ މައްސަލަ އާއި ބެހޭގޮތުން ފުލުހުން ވަކި އެއްޗެއް ބުނެފައި ނުވާއިރު އެކްސިޑެންޓްގެ މައްސަލައިގައި ދައުވާ ކުރަން ޕީޖީ އޮފީހަށް ފޮނުވި ކަމެއް ނުވަތަ ނޫންކަމެއް ނޭނގެއެވެ.
އަރުޝަމް ނިޔާވިތާ 115 ދުވަސް ވެއްޖެއެވެ. އެކްސިޑެންޓްގެ ތަހުގީގު ކުރިއަށްދާ ކަމެއް ނުވަތަ ނޫންކަމެއް ވެސް ފުލުހުން ހާމައެއް ނުކުރެއެވެ.
ދައުލަތުގެ ވުޒާރާއެއްގެ ޕިކަޕަކުން ޖެހުމުން، އެއީ "މައްސަލަ" އެއް ނޫންކަމަށް ވެގެން ނުވާނެއެވެ. އަދި އެ އެކްސިޑެންޓް ތަހުގީގް ލަސްކުރަން ބަހަނާ ދައްކާނެ ޖާގައެއް ޤާނޫނުތަކުން ނުދެއެވެ.