"ބެޔަސް ނުބެޔަސް"، ބޮޑު އޮޅުވާލުމެއް!؟

ދެހާސް ތޭރަ ވަނަ އަހަރުގެ ރިޔާސީ އިންތިޚާބުގައި މިހާރުގެ ރައީސް އަބްދުﷲ ޔާމީންގެ އެންމެ މަޝްހޫރު ވައުދަކީ "ބެޔަސް ނުބެޔަސް" ދިހަ ހާސް ރުފިޔާ ޔަޤީން" ކަމަށް ވިދާޅުވެ ވެވަޑައިގެންނެވި ވައުދެވެ.

އިންތިޚާބުގެ ތެރޭގައި ރައީސް ޔާމީނާއި ޕީޕީއެމްގެ އިސްސަފުގައި ތިއްބެވި ބޭފުޅުން ވިދާޅުވި ގޮތުގައި، ހަމަ ކޮންމެ މަހަކު "ބެޔަސް ނުބެޔަސް ދިހަ ހާސް ރުފިޔާ" ލިބޭނެއެވެ. އޭރު އެއީ ކިހިނެތް ހަމަޖައްސާފައި އޮތް ކަމެއް ކަން ތަފްސީލީ ގޮތެއްގައި ހާމައެއް ނުކުރެއެވެ.

ރައީސް ޔާމީންގެ ވެރިކަމުގެ ދައުރު ނިމިގެން ދާއިރު ވެސް، މިކަން އޮތީ ހަމަ މިގޮތަށެވެ. "ބެޔަސް ނުބެޔަސް" އަކީ ކޮބައިކަން އަންގައި ދިނުމަށް ސަރުކާރުގެ ފަރާތުން އެކަށީގެންވާ މަސައްކަތެއް ކުރާ ތަނެއް ނުފެނެއެވެ. އެއީ ކިހިނެތް ހިނގާ ކަމެއް ކަން ގިނަ މަސްވެރިންނަށް ނުވެސް އެނގެއެވެ.
އެކަން މަސްވެރިންގެ ވާހަކަތަކުން އެނގެ އެވެ.

'އައްޑޫލައިވް' އާއި ވާހަކަ ދެއްކި ހިތަދޫގެ މަސްވެރިޔަކު ބުނި ގޮތުގައި، "ބެޔަސް ނުބެޔަސް" އާއި ބެހޭ މައުލޫމާތު އެއްވެސް ވަރަކަށް ނޭނގޭ ކަމަށެވެ. އެހެން ނަމަވެސް އެ ފައިސާ ލިބިއްޖެ ނަމަ މަސްވެރިކަން ދަށް ދުވަސްވަރު މަސްވެރިންގެ އާއިލާތަކަށް ލިބޭނެ ލުއި ފަސޭހައަކަށް ވާނެ ކަމަށެވެ.

"ތެދަށް ބުނަންޏާ ބޭބެ އަކަށް އެހާ ބޮޑަކަށް ތި ކިހިނެތް ދޭ އެއްޗެއްކަން ނޭނގޭ. އެނގޭ ކަމަކީ ކެމްޕެއިންގައި ޔާމީނު ތިހެން ބުނިކަން. ދެން މިހާރު އެވާހަކަ ނުދައްކާކަން." މިވަގުތު ހިތަދޫ ބަނދަރުގައި އޮތް ގދ. އަތޮޅުގެ މަސްދޯންޏެއްގެ ކެޔޮޅަކު ބުންޏެވެ.

"ބެޔަސް ނުބެޔަސް"ސްކީމް އަކީ ކޮބާ؟

އިންތިހާބުގެ ދުވަސްވަރު ސިޔާސީ ފަރާތްތަކުން ކޮންމެ ވާހަކަ އެއް ދެއްކިއަސް މިނިސްޓްރީ އޮފް ފިޝަރީޒް އިން އެގްރިކަލްޗަރުން އެކުލަވާލާފައިވާ "ބެޔަސް ނުބެޔަސް" ސްކީމަކީ ފަންޑު މެނޭޖުކޮށްގެން ހިންގާ ސްކީމެކެވެ. މާނައަކީ މި ސްކީމުގެ ފައިސާއަކީ ދައުލަތުގެ ބަޖެޓަށް ވަންނަ ފައިސާއަކަށް ނުވުމެވެ.

ފައިސާ ދައުރުކުރާނީ ދޯނިތަކުގެ ސައިޒަށް ބަލައިގެން އެ ފަންޑުގެ ތެރެއިން ކަމަށް ފިޝަރީޒް މިނިސްޓްރީން މީގެ ކުރިން ވަނީ ބުނެފައެވެ.

"ބެޔަސް ނުބެޔަސް" މ ފަންޑު ހިންގަން ސަރުކާރުން ރާވާފައިވަނީ މަސްވެރިންގެ އަތުން "ޕްރިމިއަމް"އެއް ދައްކައިގެންނެވެ.

ފައިސާ ދޫކުރުގެ ގޮތުން ދޯނިފަހަރު ވަނީ ތިން ދަރަޖައަކަށް ގިންތިކޮށްފައި ވާއިރު އޭގެ ތެރޭގައި ހިމެނެނީ 65 ފޫޓަށް ވުރެ ބޮޑެތި އުޅަނދާއި، 65-45 ފޫޓުގެ އުޅަނދު އަދި 45 ފޫޓަށް ވުރެ ކުދި އުޅަނދެވެ.

"ބެޔަސް ނުބެޔަސް" ސްކީމްގެ ދަށުން، 65 ފޫޓަށް ވުރެ ބޮޑެތި އުޅަނދުފަހަރުގައި މަހަށް ދާ ކޮންމެ މަސްވެރިއަކަށް 10،000ރ. ލިބެ އެވެ. މި ކެޓަގަރީގައި ހިމެނޭ މަސްވެރިން ޕްރިމިއަމްގެ ގޮތުގައި ސްކީމަށް ދައްކަން ޖެހެނީ މަހަކު 500ރ. އެވެ. އެއީ އަހަރަކަށް ބަލާ ނަމަ ގާތްގަނޑަކަށް 6،000ރ. އެވެ. މި ފައިސާ ދައްކަން ޖެހެނީ ގަނޑުކޮށެވެ.

އަދި 65-45 ފޫޓުގެ އުޅަނދުފަހަރުގައި މަހަށް ދާ މަސްވެރިންނަށް މަހަކު 5،000ރ. ލިބެ އެވެ. މި ބައިގައި ހިމެނޭ މަސްވެރިން، ޕްރިމިއަމްގެ ގޮތުގައި ދައްކަން ޖެހެނީ މަހަކު 400ރ. އެވެ. އެއީ މުޅި އަހަރަށް ބަލާނަމަ ގާތްގަނޑަކަށް 4،800ރ. އެވެ.

45 ފޫޓުން ދަށުގެ އުޅަނދުފަހަރުގައި މަހަށް ދާ މީހުންނަށް 3،500ރ. ލިބެ އެވެ. އެ ކެޓަގަރީގައި ހިމެނޭ މަސްވެރިން ޕްރިމިއަމްގެ ގޮތުގައި 350ރ. ދައްކަން ޖެހެ އެވެ. އެއީ މުޅި އަހަރަށް ބަލާ ނަމަ ގާތްގަނޑަކަށް 4،200ރ. އެވެ.

ފިޝަރީޒް މިނިސްޓްރީން "ބެޔަސް ނުބެޔަސް" ސްކީމް އެކުލަވާލާފައިވާ ގޮތުން މަސްވެރި އުޅަނދު ފަހަރަށް ފައިސާ ދޫކުރާނީ ކޮންމެ 3 މަހަކުން 1 ފަހަރުއެވެ. އަދި ފައިސާ ދޫކުރަނީ، މަހެއްގެ ތެރޭގައި އެ ދޯންޏަށް ލިބުނު އާމްދަނީ ބަހާލުމުން ފަޅުވެރިއަކަށް ޖެހޭ އަދަދު ދިހަ ހާސް ރުފިޔާ ހަމަ ނުވާނަމައެވެ. މިސާލަކަށް ފަޅުވެރިއަކަށް ޖެހޭ އަދަދަކީ، 9 ހާސް ރުފިޔާ ކަމަށް ވެއްޖެ ނަމަ ބެޔަސް ނުބެޔަސް ސްކީމުން ދޭނީ އެ މަހު ކޮންމެ ފަޅުވެރިިއަކަށް އެއް ހާސް ރުފިޔާއެވެ.

"ބެޔަސް ނުބެޔަސް" ސްކީމްގައި ބައިވެރިވުމަށް އެތައް ކަމެއް ކުރަން ޖެހޭ!

"ބެޔަސް ނުބެޔަސް" ސްކީމްގައި ބައިވެރިވުމަށް މަސްވެރި އުޅަނދު ފަހަރެއްގައި ވެސަލް ލޮކޭޓިން ޑިވައިސް އެއް ހަރުކުރަން ޖެހެއެވެ. މި ޑިވައިސް މެދުވެރިކޮށް މިނިސްޓްރީއަށް އުޅަނދުގެ ހަރަކާތްތައް ފެންނައިރު، އެ ދޯނިން ގަވާއިދުން މަސްވެރިކަމުގެ މައުލޫމާތު މިނިސްޓްރީ އަށް ފޮނުވަން ޖެހެއެވެ.

ވެސަލް ލޮކޭޓިން ޑިވައިސްގެ ހަރުކުރުމުގެ ޚިދުމަތް ދެމުން ދަނީ މިނިސްޓްރީ އާއި ދިރާގާއި ދެމެދު އެކުލަވާލެވިފައިވާ އެއްބަސްވުމެއްގެ ދަށުންނެވެ. ގާތްގަނޑަކަށް 18 ހާސް ރުފިޔާގެ އަގު ހުރި ޑިވައިސް ހަރުކުރުމަށް ގިނަ މަސްވެރިންތަކެއް އެދުނު ނަމަވެސް އެންމެ އެކަށީގެންވާ ގޮތެއްގައި ދިރާގަކަށް ނުކުރެވެއެވެ.

"މިހާރު 1 އަހަރު ވެއްޖެ. ޑިވައިސް ހަރުކުރަން ފޯމު ލައިފިން. މިނިސްޓްރީން ބުނަނީ ދިރާގުން ގުޅާނެއޭ. ދެން މީ އަޖައިބެއްތާ." މަރަދޫ މަސްވެރިޔަކު ބުންޏެވެ.

ފިޝަރީޒް މިނިސްޓްރީގެ ހިސާބުތަކުން އެނގޭ ގޮތުގައި ރާއްޖޭގައި ކަޅުބިލަމަހާއި ކަންނެލި މަސްވެރިކަން ކުރުމަށް 800 އާއި ގާތްކުރާ އަދަދަކަށް އުޅަނދެއް ލައިސަންސް ނަގާފައި ވެއެވެ. އޭގެ ތެރޭގައި ހިމެނޭ ދޯނި ފަހަރުގެ 80 ޕަސެންޓަކީ 65 ފޫޓަށްވުރެ ބޮޑެތި އުޅަނދުފަހަރެވެ. އަދި 65-45 ފޫޓުގެ އުޅަނދުފަހަރަކީ މީގެ 15 ޕަސެންޓެވެ. އަދި 5 ޕަސެންޓަކީ 45 ފޫޓުން ދަށުގެ އުޅަނދުފަހަރެވެ.

މިނިސްޓްރީގެ ފަރާތުން މީގެ ކުރިން އާއްމުކޮށްފައިވާ ހިސާބުތަކުން އެނގޭ ގޮތުގައި ރާއްޖޭގައި 12 ހާހަށް ވުރެ ގިނަ އަދަދެއްގެ މަސްވެރިން އެބަ ތިއްބެވެ.އެ އަދަދު 15 ހާހާއި ގާތްކުރާނެ ކަމަށް ފިޝަރީޒް މިނިސްޓަރު ޝައިނީ ވަނީ ވިދާޅުވެފައެވެ.

"ބެޔަސް ނުބެޔަސް" ސްކީމަކީ މަސްވެރިންނަށް ބޭނުންތެރި މުހިންމު ސްކީމެކެވެ. އެހެން ނަމަވެސް އެ ސްކީމާއި ބެހޭގޮތން މަސްވެރިންނަށް މައުލޫމާތު ދިނުމުގައި ފިޝަރީޒް މިނިސްޓްރީ ވަނީ ފެއިލްވެފައެވެ.

"ބެޔަސް ނުބެޔަސް" ސްކީމްގެ މައުލޫމާތު މަސްވެރިންނަށް ނުދީ، އެ ސްކީމް ވަރަށް ކާމިޔާބު ކަމަށް ވަޒީރަކު ވިދާޅުވުމަކީ އެއީ ހަގީގަތް އޮޅުވާލުމެވެ. އެ ސްކީމްގައި ބައިވެރިވި މީހުންގެ އަދަދު ހާމަކުރަން މިނިސްޓްރީން ޖެހިލުން ވުމަކީ މަސްވެރިން ބުނާ ގޮތުގައި "މަކަރުވެރިކަމުގެ އިންތިހާ"އެވެ.