އައްޑޫ ސިޓީ، ލިންކް ރޯޑުގައި ދުއްވާފައި ދިޔަ ކާރަކުން ބައިސްކަލެއްގައި ޖެހި ނުރައްކާތެރި އެކްސިޑެންޓެއް ހިނގައިފިއެވެ.
މި އެކްސިޑެންޓް ހިނގާފައި ވަނީ، ފޭދޫ ބަނދަރާއި ދިމާލަށް ލިންކް ރޯޑުންނެވެ.
އެކްސިޑެންޓް ހިނގި ސަރަހައްދުގައި ހުރި 'އައްޑޫލައިވް'ގެ ނޫސްވެރިޔާ ބުނި ގޮތުގައި ކާރުން ބައިސްކަލްގައި ޖެހުމުގެ ސަބަބުން، ބައިސްކަލް ދުއްވަން އިން މީހާ ވިއްސައިގެން ދިޔަ ކަމަށެވެ. އޭނާ ދުއްވި ބައިސްކަލް އޮތީ ކާރުގެ ދަށުގައެވެ.
އެކްސިޑެންޓްވި ބައިސްކަލް ދުއްވަން އިނީ އުމުރުން ދުވަސްވީ ފިރިހެނެކެވެ. އޭނާއަށް ފޭދޫ ސިއްހީ މަރުކަޒުގައި ފަރުވާދެމުން އަންނައިރު ލިބިފައިވާ އަނިޔާތަކުގެ ތަފްސީލެއް އަދި ވަނީ ލިބޭގޮތް ނުވެފައެވެ.
މި އެކްސިޑެންޓް ހިނގި އިރު ކާރުގައި އިން އަންހެނަކު ކާރުން ފޭބިތަނާ އަނބުރައިގަނެގެން ވެއްޓުމުގެ ސަބަބުން އޭނާއަށް ވެސް މިހާރު ދަނީ ފޭދޫ ސިއްހީ މަރުކަޒުގައި ފަރުވާ ދެމުންނެވެ. އެއީ ކާރު ދުއްވަން ހުރި މީހާ ކަމެއް ނުވަތަ ނޫންކަމެއް އަދި ވަނީ ސާފުވާގޮތް ނުވެފައެވެ.
އެކްސިޑެންޓްގައި އަނިޔާވި މީހުން ފޭދޫ ސިއްހީ މަރުކަަޒަށް ގެންދިޔައީ، އެތަނުގެ ސްޓްރެޗަރ ހިފައިގެން އައިސް އާންމުންގެ ބަޔެކެވެ. ފޭދޫ ސިއްހީ މަރުކަޒުގައި ޕެރަމެޑިކް އެމްބިއުލާންސެއް އޮތް ނަމަވެސް އެކްސިޑެންޓް ހިނގި ވަގުތު އެމްބިއުލާން ދުއްވާނެ މީހަކު ނެތެވެ.