އައްޑޫ ސިޓީ ފޭދޫގައި މިރޭ ހިނގި އެކްސިޑެންޓްގެ ސީން އަށް ދާން ޖެހުނުއިރު ފޭދޫ ސިއްހީ މަރުކަޒުގެ ޕެރަމެޑިކް އެމްބިއުލާން ދުއްވާނެ މީހަކު ނެތުމުން ގިނަ ބައެއްގެ ފާޑުކިޔުންތައް އަމާޒުވެއްޖެއެވެ.
މިރޭ ފޭދޫ ބަނދަރުމަތީގައި އެކްސިޑެންޓްވި އުމުރުން ދުވަސްވީ މީހާ އެންމެ ފަހުން ސިއްހީ މަރުކަޒަށް ގެންދިޔައީ، އެތަނަށް އާއްމުންގެ ބަޔަކު ގޮސް ސްޓްރެޗަރު ހިފައިގެން އައިސްގެންނެވެ.
އެކްސިޑެންޓް ހިނގި ސަރަހައްދަކީ ފޭދޫ ސިއްހީ މަރުކަޒާއި އެހާ ދުރުނޫން ހިސާބެކެވެ.
ފޭދޫ ސިއްހީ މަރުކަޒުގައި ޕެރަމެޑިކް އެމްބިއުލާންސްގެ ޑްރަވައިރަކު ނެތިގެން މީގެ ކުރިން ފޭދޫގައި ހިނގި އެކްސިޑެންޓެއްގައި ޒަޚަމްވި މީހަކަށް ފަރުވާ ދިނުމަށް ހޮސްޕިޓަލަށް ގެންދިއުން ލަސްވެގެން ގިނަ ބައެއްގެ ފާޑުކިޔުންތައް އަމާޒުވިއެވެ.
އެފަހަރު ވެސް އެކްސިޑެންޓްގައި ޒަޚަމްވި މީހުން ހިތަދޫ ހޮސްޕިޓަލަށް ގެންދިޔައީ، ހިތަދޫން ފޭދޫއަށް އެމްބިއުލާންސެއް ފޮނުވައިގެންނެވެ.