ރައީސް އަބްދުﷲ ޔާމީންގެ ސަރުކާރު ވައްޓާލަން އުޅުމުގެ ތުހުމަތުގައި ހައްޔަރުކޮށްފައިވާ ފުލުހުންގެ ސްޕެޝަލިސްޓް އޮޕަރޭޝަން(އެސްއޯ)ގެ ފުލުހުންގެ ބަންދަށް 5 ދުވަސް ކްރިމިނަލް ކޯޓުން ޖަހައިފިއެވެ.
އެ ކޯޓުން މިއަދު ބަންދުގެ މުއްދަތު އިތުރުކޮށްފައި ވަނީ، އެސްއޯގެ ކުރީގެ ކޮމާންޑަރު އިންސްޕެކްޓަރ އޮފް ޕޮލިސް ސައިފު ހުސައިން، ސްޓޭޝަން އިންސްޕެކްޓަރ ފާއިޒު މުހައްމަދު، ސްވޮޓު ޓީމުގައި މަސައްކަތް ކުރި ސާޖަންޓު އަބްދުﷲ ރިޔާޒް، ކޯޕްރަލް އަލީ ނަސީރް، ކޯޕްރަލު ހަސަން ނަސީރް، ކޯޕްރަލު މުހައްމަދު ޝާމިން އަދި ސާޖެންޓު އަހުމަދު އާސިމްއެވެ.
ހައްޔަރު ކުރި ފުލުހުންގެ މައްޗަށް ކުރާ ތުހުމަތަކީ، ސަރުކާރު ވައްޓާލުމަށް އިތުރު ބަޔަކާއި ގުޅިގެން މަސައްކަތް ކުރުމާއި، ސަލާމަތީ ބާރުތަކާ ދެކޮޅަށް ނުކުމެ ފުލުހުންނާ މާރާމާރީ ހިންގާފައި ވުމުގެ އިތުރުން ސަލާމަތީ ބާރުތަކަށް ރައްޔިތުން ކުރާ އިތުބާރު ގެއްލުވާލަން މަސައްކަތް ކުރި ކަމުގެ ތުހުމަތެވެ.