އައްޑޫ ސިޓީގެ ފޭދޫ ބަނދަރާ ދިމާލުން ލިންކްރޯޑުގައި އާދީއްތަ ދުވަހު އިރާކޮޅު ހިނގި އެކްސިޑެންޓްގައި އަނިޔާވި އުމުރުން ދުވަސްވީ މީހާއަށް ހިތަދޫ ރީޖަނަލް ހޮސްޕިޓަލްގައި ފަރުވާ ދެމުން ގެންދަނިކޮށް ނިޔާވެއްޖެއެވެ.
އާދީއްތަ ދުވަހުގެ ރޭގަނޑު 7 ޖަހާއެކަށް ހާއިރު ހިނގި އެކްސިޑެންޓްގައި ނިޔާވީ، ސ. ފޭދޫ ދުންބުރުވާގޭ އަބްދުﷲ މަނިކުފާނެވެ.
މި އެކްސިޑެންޓް ހިނގީ އަބްދުﷲ މަނިކުފާނު ބައިސްކަލްގައި ދުއްވާފައި ދަނިކޮށް ލިންކް ރޯޑުން ދުއްވާފައި އައި ކާރަކުން ޖެހިގެންނެވެ.
ކާރުން ބައިސްކަލުގައި ޖެހުމާއި އެކު އަބްދުﷲ މަނިކުފާނު ވިއްސައިގެން ދިޔައިރު، އޭނާ ދުއްވި ބައިސްކަލް އޮތީ ކާރުގެ ދަށުވެފައެވެ.
އެކްސިޑެންޓާއި ގުޅިގެން އަނިޔާވި އަބްދުﷲ މަނިކުފާނު ފޭދޫ ސިއްހީ މަރުކަޒަށް ގެންދިއުމަށްޓަކައި އެމްބިއުލެންސް ފޮނުވަން ބެލިއިރު، އެމްބިއުލެންސް ދުއްވާނެ ޑްރައިވަރެއް ނެތިގެން އޭނާ ފޭދޫ ސިއްހީ މަރުކަޒަށް ގެންދިޔައީ އަށިގަނޑަކަށް ލައިގެން އާންމުންގެ ބައެކެވެ.
ފޭދޫ ސިއްހީ މަރުކަޒަށް އަބްދުﷲ މަނިކުފާނު ގެންދިއުމުން އެތަނުން ފުރަތަމަ ބުނީ އޭނާއަށް ސީރިއަސް އަނިޔާތަކެއް ލިބިފައި ނުވާކަމަށެވެ. އެއޭނާ ހިތަދޫ ރީޖަނަލް ހޮސްޕިޓަލަށް ގެންދިޔައީ އެކްސިޑެންޓް ހިނގިތާ ގިނަ އިރުތަކެއް ފަހުންނެވެ.
އަބްދުﷲ މަނިކުފާނު ނިޔާވީ، ހިތަދޫ ރީޖަނަލް ހޮސްޕިޓަލަށް ގެންގޮސް އައިސީޔޫގައި ފަރުވާދެމުން ދަނިކޮށެވެ.
މި އެކްސިޑެންޓާއި ގުޅޭގޮތުން މައުލޫމާތު ހޯދުމަށް ހިތަދޫ ހޮސްޕިޓަލުގެ ޑިރެކްޓަރ ޝާހު ސައީދަށް ގުޅުމުން އެބޭފުޅާ ފޯނަށް ޖަވާބު ނުދެއްވާތީ މިކަމުގައި ހޮސްޕިޓަލުގެ ބަހެއް ލިބޭގޮތް ވަނީ ނުވެފައެވެ.