ދިވެހި ދައުލަތުގެ ތެރޭގައި މިހާރު ހިނގަމުންދާ ކޮރަޕްޝަނުގެ އަމަލުތަކުގެ ފަހަތުގައި ތިއްބެވީ ރައީސް އަބުދުﷲ ޔާމީން އަބުދުލްގައްޔޫމުގެ ދެކަނބަލުން ކަމަށް ކުރީގެ އޮޑިޓަރ ޖެނެރަލް ނިޔާޒް އިބްރާހިމް ވިދާޅުވެއްޖެ އެވެ.
ނިޔާޒު ކުރެއްވި ޓްވީޓެއްގައި ވިދާޅުވެފައި ވަނީ، ކޮރަޕްޝަނުގެ އަމަލުތަކުގެ ފަހަތުގައި ރައީސް ޔާމީންގެ ދެކަނބަލުން ތިއްބެވިކަމީ، އެންމެން ދަންނަ ހަގީގަތެއް ކަމަށެވެ.
ނަސަންދުރަ ޕެލަސް ހޮޓަލު ހިންގި ބިން ކޮރަޕްޝަނަށް މަގުފަހިވާ ގޮތަށް ދޫކޮށްފައިވާ ކަމަށް ސަރުކާރުން ވަނީ އިއުތިރާފުވެފައެވެ. އެކަމަށް އިޝާރާތްކުރައްވައި ނިޔާޒު ވިދާޅުވީ، އެމައްސަލަ ގުޅިފައިވަނީ ސީދާ ރައީސް އަބްދުﷲ ޔާމީނާއި ކަމަށެވެ.
އަދި ނަސަންދުރައިގެ މައްސަލައިގެ މިނިވަން ތަހުގީގެއް ކުރުމަށް އިދިކޮޅު ފަރާތްތަކުން ވަނީ ގޮވާލާފައެވެ.
ނަސަންދުރަ ހުރި ތަނުގައި ހަތަރު ތަރީގެ ހޮޓަލެއް އެޅުމުގެ މަސައްކަތް މިހާރު ކުރިއަށްދާއިރު މިމަސައްކަތް ހަވާލުކޮށްފައިވަނީ ރައީސް ޔާމީންގެ ޅިޔަނު މުހައްމަދު މަނިކު ހިއްސާވާ ކުންފުންޏަކާއެވެ.
ދައުލަތުގެ އެންމެ ބޮޑޫ ހިޔާނާތް ފަޅާއެރި އެމްއެމްޕީއާރުސީގެ ހާއްސަ އޮޑިޓް ރިޕޯޓުން ހާމަވެފައިވާ ގޮތުގައި ނަސަންދުރައާ ގުޅޭ މުއާމަލާތްތައް ހިނގާފައި ވަނީ ވަރަށް ބޮޑެތި އޮޅުވާލުންތަކެއްގެ ތެރެއިންނެވެ.