ރައީސް އަބްދުﷲ ޔާމީން ރާއްޖޭގެ ވެރިކަމަށް ވަޑައިގަތީ، ބިން ހިއްކައިގެން ވެސް އައްޑޫގައި ފަތުރުވެރިކަމުގެ 5000 އެނދު ގާއިމްކުރާނެ ކަމަށް ބުނެ ކުރެއްވި ކެމްޕެއިނަކަށް ފަހުގައެވެ.
އައްޑޫގައި ފަތުރުވެރިކަން ކުރިއަރުވާނެ ކަމަށް ރައީސް ޔާމީން ވައުދުވެވަޑައިގެންނެވި ނަމަވެސް އެމަނިކުފާނުގެ ވެރިކަމަށް 7 އަހަރު ފުރިގެން ދާއިރު ވެސް އެކަން ކުރެވިފައެއް ނެތެވެ. ސަރުކާރުން މަޝްރޫޢުތައް އިއުލާންކުރި ނަމަވެސް އެއިން އެއްވެސް މަޝްރޫޢެއްގެ މަސައްކަތް ކުރިއަށް ދާތަނެއް ނުފެނެއެވެ.
2017 ވަނަ އަހަރުގެ އޭޕްރީލް މަހުގެ 24 ވަނަ ދުވަހު އައްޑޫގައި އިންޓަގްރޭޓެޑް ޓޫރިޒަމް ކޮންސެޕްޓަށް 3،000 އެނދު ފައްކާ ކުރުމަށް މޯލްޑިވްސް އިންޓަގްރޭޓެޑް ޓޫރިޒަމް ޑިވްލޮޕްމަންޓް ކޯޕަރޭޝަން (އެމްއައިޓީޑީސީ) އިން ވެސް ބިޔަ މަޝްރޫޢެއް އިއުލާންކުރިއެވެ.
އެ މަޝްރޫޢު އިއުލާން ކުރިތާ 11 މަހަށް ވުރެ ގިނަ ދުވަސް ވެފައިވާއިރު، އަދިވެސް އަމަލީ މަސައްކަތެއް ނުފެށެއެވެ. އަދި ފެށޭނެ ދުވަހެއް އަންދާޒާކޮށްލަން އެނގޭ މީހަކު ސަރުކާރުގައި ހުރިހެނެއް ހިއެއް ނުވެއެވެ.
"ކުރިއަށް އޮތް ދެމަހެއްގެ ތެރޭގައި އަމަލީ މަސައްކަތް ފެށޭނެ" ކަމަށް ވިދާޅުވެ ފެށި މަޝްރޫޢު ކުރިއަށް ދާނެތޯ މިއީ މިއަދު އައްޑޫގެ ގިނަ ބަޔަކު ކުރަމުންދާ ސުވާލެކެވެ. އެ ސުވާލާއި ކަންބޮޑުވުންތައް ހުރީ ހަމައެކަނި އައްޑޫގެ ރައްޔިތުންނާއި ހިސާބުގައެވެ.
ގެސްޓް ހައުސްގެ ބިޔަ މަޝްރޫޢާއި ބެހޭގޮތުން ސަރުކާރުގެ ވުޒާރާ އަކުން އަދި އެމްއައިޓީޑީސީ އަކުން ވެސް މިހާރު ވާހަކައެއް ނުދައްކައެވެ.
އެހެން ނަމަވެސް ފޮނި ހުވަފެންތަކެއް ދައްކަމުން އެ މަޝްރޫޢު އިއުލާންކުރި އިރު އެމްއައިޓީޑީސީގެ އިސްވެރިން ވެސް ބުނީ، އެ މަޝްރޫޢުގެ ދަށުން އަޅާނީ "ބޭރުން ގެނެސް ރާވާލާ ކޮޓަރިތައް" ކަމަށެވެ. އަދި އެ ތަކެތި ގެނެސްގެން 18 މަސް ދުވަހުގެ ތެރޭގައި މުޅި މަޝްރޫއު އެއްކޮށް ނިންމަން ޕްލޭން ކޮށްފައިވާ ކަމަށެވެ.
އައްޑޫގައި ފަތުރުވެރިކަން ކުރިއެރުވުމަކީ ޒަމާނުއްސުރެ އައްޑޫގެ ރައްޔިތުން ދެކެމުން އަންނަ ހުވަފެނެކެވެ. ރައީސް ޔާމީން ވެސް ވެރިކަމަށް ވަޑައިގެންފައި އެ ހުވަފެން ދައްކަވަމުންނެވެ.
އެހެން ނަމަވެސް ރައީސް ޔާމީންގެ ވެރިކަމުގެ ދައުރު ނިމިގެން ދާއިރު، މަދު ބަޔަކު އަތްޖަހައި "ޝުކުރިއްޔާ ޔާމީން" ކިޔަމުން ދިޔަ ނަމަވެސް އައްޑޫގެ ގިނަ ރައްޔިތުންގެ ސުވާލުތަކާއި ޝަކުވާތައް ގިނައެވެ.
އޭގެ ތެރެއިން އެއް ސުވާލަކީ، ޔާމީނުގެ ސަރުކާރުން އައްޑޫގައި ގެސްޓް ހައުސް މަޝްރޫއު ހިންގާނެ ހެއްޔެވެ؟