ޕީޕީއެމް ޕާލަމެންޓްރީ ގްރޫޕްގެ ލީޑަރު، އަހުމަދު ނިހާން އޭނާގެ ދަރިފުޅަށް 4.7 މިލިއަން ރުފިޔާގެ ފްލެޓެއް ގަނެފައިވަނީ "ހަލާލު" ފައިސާ އިން ކަމަށް ވިދާޅުވެއްޖެއެވެ.
މައުލޫމާތު ލިބިފައިވާ ގޮތުގައި ނިހާންގެ ދަރިފުޅު މުހައްމަދު އަލާން އަހުމަދުގެ ނަމުގައި ފްލެޓެއް ގަނެފައި ވަނީ ހުޅުމާލޭގައި ހުންނަ، ޕްލެޓިނަމް ރެސިޑެންސް އިންނެވެ.
މިކަމާއި ބެހޭ ގޮތުން "މިހާރު" ނޫހަށް ދެއްވި އިންޓަވިއު އެއްގައި ނިހާނު ވިދާޅުވީ، 9 އަހަރު ވަންދެން ރައްޔިތުންގެ މަޖިލީހުގައި މަސައްކަތް ކުރައްވާފައި ވާތީ މިހާތަނަށް ޖުމްލަ 8.5 މިލިއަން ރުފިޔާ ލިބިވަޑައިގެންފައިވާ ކަމަށެވެ.
ނިހާނު ވިދާޅުވި ގޮތުގައި ބޭންކް އޮފް މޯލްޑިވްސް އާއި ރާއްޖޭގެ އެހެން ބޭންކަކުން ބޯހިޔާވަހިކަމަށް ޚާއްސަ ލޯނެއް ވަނީ ނަންގަވާފައެވެ.
މީގެ އިތުރުން ފްލެޓް ބައްލަވައިގަތީ "ހައްގު ގޮތުގައި، ގާނޫނާއި ގަވައިދުގެ ތެރެއިން" ކަމަށް ވެސް ނިހާނު ވަނީ ވިދާޅުވެފައެވެ.