ލަންޑަން (ޑިސެމްބަރު 30) – އިނގިރޭސި ޕްރިމިއާ ލީގުގައި ރޭ ވެސްޓް ބްރޮމް އާއި ބައްދަލުކޮށް އަތުން 2- 0 އިން މޮޅުވެ، ތާވަލްގެ އެއްވަނައިގައި އޮތް މެންޗެސްޓާ ޔުނައިޓެޑުން ލީޑު ދަމަހައްޓައިފި އެވެ.
ޔުނައިޓެޑްގެ އަމިއްލަ ދަނޑު އޯލްޑްރަފޯޑްގައި ކުޅުނު މެޗްގެ ފުރަތަމަ ގޯލް މެޗްގެ ނުވަ ވަނަ މިނިޓުގައި ޔުނައިޓެޑަށް ކަމިޔާބުކުރެވުނީ މަންޗެސްޓާރގެ އެޝްލީ ޔަންގު ފޮނުވާލި ބޯޅަ ވެސްޓް ބްރޮމްގެ ގެރެތު މިކައުލީ އަތުން ބައިކޮޅަށް ވަނުމުންނެވެ. އަދި މަންޗެސްޓަރގެ ދެވަނަ ލަނުޑު މެޗުގެ ފަހު މިނިޓުގައި ޔުނައިޓެޑަށް ކާމިޔާބު ކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެންއެރި ރޮބިން ވެން ޕާސީ ޖެހި ހިތްގައިމު ލަނޑުންނެވެ.
ޔުނައިޓެޑްގެ ތާވަލްގެ އެއްވަނައިގައި އޮތީ 49 ޕޮއިންޓާއެކު އެވެ. ދެވަނައިގައި 42 ޕޮއިންޓާއެކު އޮތީ ލީގުގެ އެންމެ ފަހުގެ ޗެމްޕިއަން މެންޗެސްޓާ ސިޓީ އެވެ. ސިޓީ ވަނީ ރޭ ނޯވިޗް ސިޓީ އަތުން 4- 3 އިން މޮޅުވެފަ އެވެ.
"އަހަރެމެން މިހާރު މި އޮތީ ރަނގަޅު މަގާމެއްގަ،" މެޗަށް ފަހު ބީބީސީއާ ވާހަކަދައްކަމުން ޔުނައިޓެޑްގެ ކޯޗު އެލެކްސް ފާގަސަން ބުންޏެވެ. "ލީގު ޗެމްޕިއަންކަން ހޯދަން ކުރާ މަސައްކަތުގެ އެއް ބައި މި ހާސިލްވީ. މި ހަފުތާގައި އަދި އެބައޮތް ވިގަންއާ ދެކޮޅަށް ރަށުން ބޭރުގައި ކުޅޭ މެޗު. މި މެޗުގައި ރެސްޓް ދިން ކުޅުންތެރިންނަށް އެ މެޗަށް އެރޭނެ. އަހަރެމެން ބޭނުންވަނީ އެ މެޗުން ވެސް މޮޅުވަން."
ނޯވިޗްގެ ދަނޑުގައި ކުޅުނު މެޗުގެ ފުރަތަމަ ހާފު ނިމެނިކޮށް ސިޓީގެ ސަމިރު ނަސްރީ އަށް ރަތްކާޑު ދެއްކި ނަމަވެސް، ސިޓީ މެޗުން މޮޅުވީ އެޑިން ޖެކޯ ޖެހި ތިން ލަނޑާއި ސާޖިއޯ އަގުއޭރޯ ޖެހި ލަނޑަކުންނެވެ. މެޗުގައި ނޯވިޗްގެ ކްރިސް މާޓިން ދެ ލަނޑު ޖެހިއިރު، އެންތަނީ ޕިކިންޓަން ވެސް ވަނީ ލަނޑެއް ޖަހައިފަ އެވެ.
މެޗަށް ފަހު ސިޓީގެ ކޯޗު ރޮބާޓޯ މަންޗީނީ ބުނީ 10 މީހުންނާއެކު ކުޅެ، މެޗުން މޮޅުވުމުން ހިތްހަމަޖެހޭ ކަމަށެވެ. އެކަމަކު ނަސްރީ އަށް ދެއްކި ރަތްކާޑާމެދު ހިތްހަމަނުޖެހޭ ކަމަށެވެ.
ތިއޯ ވޮލްކޮޓްގެ ހެޓްރިކާއެކު އަމިއްލަ ދަނޑުގައި ރޭ ނިއުކާސަލް އަތުން 7- 3 އިން މޮޅުވެ، އާސެނަލް ވަނީ ތާވަލްގެ ފަސް ވަނަ އަށް ޖެހިލައިފަ އެވެ. މެޗުގައި އާސެނަލް އޮލިވާ ޖިރޫ ދެ ލަނޑުޖެހިއިރު، އެލެކް އޮކްލޭޑް ޗެމްބަލެއިން އާއި ލޫކަސް ޕޮޑޮލްސްކީ ވެސް ވަނީ ލަނޑު ޖަހައިފަ އެވެ. ނިއުކާސަލްގެ ޑެމްބާބާ ދެ ލަނޑުޖެހިއިރު، ސިލްވަން މާވޯ ވެސް ވަނީ ލަނޑެއް ޖަހައިފަ އެވެ.
މެޗަށް ފަހު އާސެނަލްގެ ކޯޗު އާސެން ވެންގާ ވަނީ ވޮލްކޮޓަށް ތައުރީފްކޮށްފަ އެވެ.
"ވޮލްކޮޓް މި މެޗުގައި ވަރަށް ރަނގަޅަށް ކުޅުނު. މި މެޗުން ފެނިއްޖެ އޭނާގެ ފެންވަރު،" ވެންގާ ބުންޏެވެ.
ލީގުގައި ރޭ ސަންޑަލޭންޑް އަތުން 2- 1 އިން ޓޮޓެންހަމް ހޮޓްސްޕާ މޮޅުވިއިރު، އެސްޓަން ވިލާ އަތުން ވިގަން މޮޅުވީ 3- 0 އިންނެވެ. ފުލަމް އަތުން 2- 1 އިން ސްވަންސީ މޮޅުވިއިރު، ވެސްޓް ހޭމް އަތުން ރެޑިން މޮޅުވީ 1- 0 އިންނެވެ. — އޭއެފްޕީ