އައްޑޫ ސިޓީ، ހިތަދޫ ފިހާރައެއްގެ ތެރޭގައި އެތަނުގެ އަންހެން މުވައްޒަފަކަށް ޖިންސީ ފުރައްސާރަ ކުރި މައްސަލަ ފުލުހުން ބަލަމުން ނުދާ ކަމަށް ބުނެ ގިނަ ބައެއްގެ ފާޑުކިޔުން ފުލުހުންނަށް އަމާޒުވެއްޖެއެވެ.
ހިތަދޫ ބޮޑުމަގުގައި ހުންނަ ފިހާރައެއްގެ ތެރޭގައި އަންހެން މުވައްޒަފަށް ޖިންސީ ފުރައްސާ ކުރީ، ފިހާރައިގެ ވެރިފަރާތުގެ އާއިލާ މީހެކެވެ.
އެކަމާއި ގުޅިގެން އޭނާ އާއި ފުލުހުން ސުވާލު ކުރި ކަމެއް ނުވަތަ ނޫންކަމެއް ނޭނގެއެވެ. އެކަން އޮޅުން ފިލުވުމަށް 'އައްޑޫލައިވް'ގެ ފަރާތުން ފުލުހުންގެ މީޑިޔާ އޮފިޝަލަށް އިއްޔެ އިން ފެށިގެން ގުޅި ނަމަވެސް އެބޭފުޅާ ފޯނަށް ޖަވާބު ނުދެއްވާތީ މިކަމުގައި ފުލުހުންގެ ބަހެއް އަދި ވަނީ ލިބޭގޮތް ނުވެފައެވެ.
އަންހެން މުވައްޒަފަށް ޖިންސީ ފުރައްސާ ކުރި މައްސަލަ ވަނީ ޖެންޑަރގެ ސަމާލުކަމަށް ގެނެސްފައެވެ. އެހެން ނަމަވެސް މައްސަލަ ޖެންޑަރ މިނިސްޓްރީން ވެސް ފިޔަވަޅެއް އެޅިކަމެއް ނޭނގެއެވެ.
ޖިންސީ ފުރައްސާރަ އާއި ކުރިމަތިލާން ޖެހުނު އަންހެން ކުއްޖާ 'އައްޑޫލައިވް' އަށް މައުލޫމާތު ދެމުން ބުނި ގޮތުގައި، ފިހާރައިގައި މަސައްކަތް ކުރާ ފިރިހެނަކު އޭނާ އަށް ޖިންސީ ގުޅުން ހިންގުމަށް އެތައް ފަހަރެއް މަތިން ދައުވަތު ދީފައިވާ ކަމަށެވެ.