މިދިޔަ ބުރާސްފަތި ދުވަހު ފަސް އަހަރަށް ޖަލަށް ހުކުމް ކުރި ސަލްމާން ހާން ކަފާލާތުގެ ދަށުން މިއަދު ދޫކޮށްލަން ޖޯދްޕޫރް ކޯޓުން ނިންމައިފި އެވެ.
ކަފާލާތުގެ ގޮތުގައި ސަލްމާން 50،000 ރުޕީސް ބަހައްޓަން ޖެހެ އެވެ. އިންޑިއާގައި ހިމާޔަތްކޮށްފައިވާ ފުއްލާގެ ބާވަތެއް ކަމަށްވާ ބްލަކްބަކްސް ޝިކާރަ ކުރި މައްސަލަ ސަލްމާން، 52، ގެ މައްޗަށް ސާބިތުވެ ފަސް އަހަރަށް ޖަލަށް ލާން ހުކުމް ކުރުމުގެ އިތުރުން 10،000 ރުޕީސް އިން ޖޫރިމަނާ ވެސްކޮށްފައިވެ އެވެ.
އޭނާ ކަފާލާތުގެ ދަށުން މިއަދު ދޫކޮށްލަން ނިންމީ ޖޯދްޕޫރްގެ ޑިސްޓްރިކްޓް ކޯޓްގައި ދެ ދުވަސް ހޭދަކޮށްފައި ވަނިކޮށެވެ.
ސަލްމާން ހާނާއާ އެކު "ހަމް ސާތު ސާތު ހޭ (1999) ކާސްޓުންގެ ތެރޭގައި ހިމެނޭ ސައިފް އަލީ ހާން، ތައްބޫ، ސޮނާލީ ބެންޑްރޭ އަދި ނީލަމް ކޮތާރީ އަށް ވެސް ދައުވާ ކުރި އެވެ. އެކަމަކު އެ މީހުންގެ މައްޗަށް ކުށް ސާބިތު ނުވެ އެވެ.
އެ މީހުން ބްލެކްބަކް ޝިކާރަ ކުރި ކަމަށް ބުނެ ދައުވާ ކުރީ 1998 ގައި "ހަމް ސާތު ސާތު ހޭ" ގެ ޝޫޓިން އަށް ޖޯދްޕޫރްގައި ނެގި ދުވަސްވަރު އެވެ.