ސިޔާސީ ޕޯޑިއަމްތަކުގައި އެކި މީސް މީހުން ޖަލަށް ލާނެ ކަމަށް ބުނެ އިނގުރައިދޫ ދާއިރާގެ މަޖިލިސް މެންބަރު އިބްރާހިމް ފަލާހު ވާހަކަ ދައްކަވަމުން ގެންދަވާތީ އެކަމަށް މެންބަރު އަހްމަދު މަހްލޫފް ރައްދު ދެއްވައިފިއެވެ.
މަހްލޫފް ކުރެއްވި ޓްވީޓެއްގައި ވިދާޅުވީ ހިނި އައިސްފައި ތިބެ ވާހަކަ ދައްކަނީ، ޖަލަކީ ކިހާ ވަރެއްގެ ތަނެއްކަން އިހްސާސް ނުކުރެވޭތީ ކަމަށެވެ.
މަހްލޫފް މިހެން ވިދާޅުވެފައި ވާއިރު ފަލާހު ވަނީ އެތައް ފަހަރެއްގެ މަތިން ކުރީގެ ރައީސް މުހައްމަދު ނަޝީދު ރާއްޖެ ވަޑައިގެންފި ނަމަ ޖަލަށް ލާނެ ކަމަށް ވިދާޅުވެފައެވެ.
"މީގެން މީހަކަށް 1 ދުވަސް ވެސް ޖަލުގައި ކެތްކޮށްލެވޭނެތޯ އެއީ ބޮޑު ސުވާލެއް . ބަލަން ތިބެމާ." މަހްލޫފް ވިދާޅުވިއެވެ.
ފަލާހަށް ރައްދު ދެއްވަމުން މަހްލޫފް ވިދާޅުވެފައި "ހީނހީނފައި ޖަލަށް ލާ ވާހަކަ ދައްކަނީ" އެންމެ ދުވަހަކު ވެސް އާއިލާ އާއި ދުރުގައި ޖަލުގައި ހޭދަކުރުމަކީ ކިހާ ހިތްދަތި އަނިޔާއެއްކަން ނުވިސްނޭތީ ކަމަށެވެ.