ދުންފަތުގެ އިސްތިއުމާލު ކުރުމާއި ދުރުހެލިވާން ބޭނުންވާ ފަރާތްތަކަށް އެފުރުސަތު ދިނުމުގެ ގޮތުން އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް)ގައި ޓޮބޭކޯ ސެސޭޝަން ކްލިނިކެއް އިއްޔެ ހުޅުވައިފިއެވެ.
އެކްލިނިކް ހުޅުވުމަށް ބޭއްވި ރަސްމިއްޔާތުގައި ވާހަކަ ދައްކަވަމުން މިނިސްޓަރ އޮފް ޖެންޑާ އެންޑް ފެމިލީ ޒެނީޝާ ޝަހީދު ޒަކީ ވިދާޅުވީ، ރާއްޖޭގައި ދުންފަތުގެ އިސްތިއުމާލު ކުރާ ޒުވާނުންނާއި ކުޑަކުދިން ތިބި ކަމީ ކަންބޮޑުވާން ޖެހޭ ކަމެއް ކަމަށެވެ.
މީގެ އިތުރުން ދުންފަތުގެ އިސްތިއުމާލު ކުރުމުން ސިއްހަތަށް ލިބޭ ގެއްލުންތަކާއި އެކަމުން ދުރުހެލިވުމުގެ މުހިއްމުކަން ފާހަގަކުރައްވަމުން މިނިސްޓަރު ވިދާޅުވީ، ސެސޭޝަން ކްލިނިކަކީ އެކަމުން ދުރުހެލިވާން ބޭނުންވާ ފަރާތްތަކަށް އެކަން ފަހިކޮށްދިނުމުގެ ގޮތުން ހުޅުވި ކްލިނިކެއް ކަމަށެވެ.
އަދި ވީހާވެސް ގިނަ ފަރާތްތަކުން ކްލިނިކްގެ ބޭނުން ހެޔޮގޮތުގައި ހިފުމަށް މިނިސްޓަރު ގޮވާލެއްވިއެވެ.
ކްލިނިކް ހުޅުވުމުގެ ކުރިން އެތަނުގައި މަަސައްކަތް ކުރުމަށް ވަކި ހާއްސަ ތަމްރީނުތަކެއް މުވައްޒަފުންނަށް ދީފައިވެއެވެ.
ދުންފަތާއި ދުރުހެލިވާން ބޭނުންވާ ފަރާތްތަކަށް ބޭނުންވާނެ ގިނަ ޚިދުމަތްތަކާއިއެކު ހުޅުވި އެކްލިނިކް އިން ކައުންސިލިންގެ ހިދުމަތް ވެސް ފޯރުކޮށްދޭން ހަމަޖެހިފައިވެއެވެ. އަދި ނިކޮޓިން އެޑިކްޝަން އިން ސަލާމަތް ކުރުމަށް ބޭނުންވާ ގިނަ ވަސީލަތްތަކެއް ވެސް ގާއިމުކޮށްފައިވެއެވެ.