"އާ ބާރެއް" ގެ ނަމުގައި އެމްޑީޕީ ގެ ވަރަށް ޚާއްޞަ ބޮޑު ޖަލްސާއެއް ހުކުރު ދުވަހުގެ ރޭ މާލޭގެ ކާނިވާ ސަރަހައްދުގައި ބޭއްވުމަށް ނިންމައިފި އެވެ.
އެމްޑީޕީގެ އިންތިޒާމް ކޮމިޓީ އިން “އާ ބާރެއް” ގެ ނަމުން ހަވާލާދެވޭ މި ޖަލްސާ އަކީ ސިޔާސީ ޕާޓީއެއްގެ ގޮތުގައި އެމްޑީޕީ އިން ކުރިއަށް ގެންދާ އިންޞާފުގެ ދަތުރާއި، ވަޢުދާ ހިގުމާއި "ދޭތިން ފަހެތީ" ގެ މަސައްކަތްތަކަށް ލިބިގެންދާ އިތުރު ހަލުއި ކަމާއި ވާގިވެރިކަން، އަދި އެކުވެރިކަމާއި ކުރިއެރުން ފާހަގަ ކުރަން ބޭއްވޭ ބޮޑު ޖަލްސާއެއް ކަމަށް އެ ޕާޓީން ބުނެ އެވެ.
މި ޖަލްސާގައި އެމްޑީޕީގެ މެމްބަރުންނާއި ހެޔޮ އެދިލައްވާ ވީހާ ގިނަ ފަރާތަކުން ބައިވެލެއްވުމަށް އެމްޑީޕީގެ ހުރިހާ ދާއިރާއަކުންނާއި، އަންހެނުންގެ ރޫހުން އަދި ޒުވާނުންގެ ހިތްވަރުގެ ހަރަކާތްތެރިން ގެންދަވަނީ އިލްތިމާސް ކުރެ އެވެ.
އެމްޑީޕީ ގެ “އާ ބާރެއް” ބޮޑު ޖަލްސާގައި އެމްޑީޕީ ޕާލިމެންޓަރީ ގްރޫޕުގެ މެމްބަރުންނާއި ޗެއަޕާސަންގެ އިދާރީ އަދި މާލީ ނައިބުންނާއި ސެކެޓްރީ ޖެނެރަލް އަދި ކޮމިޓީ ތަކުގެ މެމްބަރުންނާއި ޗެއަޕާސަނާއި، ރިޔާސީ ކެންޑިޑޭޓް ވެސް ބައިވެރިވެ ވަޑައިގަންނަވާނެ އެވެ.