18 ވަނަ ރައްޔިތުންގެ މަޖިލީހުގައި މަސައްކަތް ކުރައްވާ މެންބަރުންގެ ތެރެއިން ޕީއެޗްޑީ ޙާސިލް ކުރައްވާފައިވާ ހަމައެކަނި މެންބަރަކީ، ނިލަންދޫ ދާއިރާގެ މެންބަރު ޑރ.އަބްދުﷲ ހަލީލެވެ. 2015 ވަނަ އަހަރުގެ ސެޕްޓެމްބަރު މަހުގެ ތެރޭގައި ޚަލީލު، ޔުނިވާސިޓި އޮފް ބުރުނާއީ ދާރުއްސަލާމުން ޕީއެޗްޑީ ޙާސިލްކުރެއްވުމާއި އެކު ދިވެހި ރައްޔިތުންގެ ތެރެއިން ގިނަ ބަޔަކު އެބޭފުޅާއަށް ހޫނު މަރުޙަބާއެއް ކިޔާފައިވެއެވެ.
ޑރ.ޚަލީލު ތަމްސީލް ކުރައްވާ، ނިލަންދޫ ދާއިރާގެ ރައްޔިތުންގެ އިތުރުން ރާއްޖޭގެ ގިނަ ރައްޔިތުން ވެސް ބުނަމުން ދިޔައީ އެއީ ފަޚުރުވެރިވާ ފަދަ ކަމެއް ކަމަށެވެ.
އެހެން ނަމަވެސް ޚަލީލު ޕީއެޗްޑީ ޙާސިލްކުރެއްވި ފަހުން 3 އަހަރު ވާން ކައިރިވެފައިވާއިރު، މިފަހަކަށް އައިސް އެބޭފުޅާ ދައްކަވާ އެކި ވާހަކަތަކުން ގިނަ ބައެއްގެ ފާޑުކިޔުންތައް ދަނީ އަމާޒުވަމުންނެވެ. ވަކިން ޚާއްސަ ގޮތެއްގައި، ސަރުކާރުން ޤާނޫނާއި ޚިލާފަށް ކުރައްވާ ކަންތަކުގެ ދިފާޢުގައި ޑރ.ޚަލީލު ދައްކަވާ ވާހަކަތަކަކީ ގިނަ ބަޔަކު ބުނާ ގޮތުގައި "ތާކުންތާކު ނުޖެހޭ މޮޔަ" ވާހަކަތަކެކެވެ.
މިހާރު އަނެއްކާވެސް ސޯޝަލް މީޑިޔާގައި ޚަލީލަށް ގިނަ ބަޔަކު ފާޑުކިޔަން ފަށާފައި މިވަނީ، ކުރީގެ ރައީސް މައުމޫން އަބްދުލްޤައްޔޫމު ކުށެއް ނުކުރައްވާކަން ސާބިތުކޮށްދޭން ޖެހޭނީ އެމަނިކުފާނު އަމިއްލަފުޅަށް ކަމަށް ވިދާޅުވުމާއި ގުޅިގެންނެވެ.
"މައުމޫން ފަދަ ބޭފުޅެއްގެ މައްޗަށް ތުހުމަތު ތަކެއް ކުރެވިފައި ވުމުން އެމަނިކުފާނު އެބަޖެހޭ ކުށުން ބަރީއްޔަވާން. އެމަނިކުފާނުގެ ކުށެއްނެތްކަން ހާމަކޮށް ދެއްވުމަކީ އެމަނިކުފާނު ކުރައްވަން ޖެހިވަޑައިގަންނަވާނެ ކަމެއް" ޚަލީލު ވިދާޅުވެފައިވެއެވެ.
ޚަލީލުގެ މި ވާހަކަތަކަށް ބަލާއިރު ރާއްޖޭގެ ހުރިހާ ރައްޔިތުންނަކީ ކުށްވެރިން ހެއްޔެވެ؟ އެހެން ކަމަށް ވެއްޖެ ނަމަ ޚަލީލް ވެސް ހިމެނޭ ގޮތަށް ކޮންމެ ރައްޔިތަކު ވެސް އެމީހެއްގެ ކުށެއް ނެތްކަން ސާބިތުކޮށްދޭން ފުރަތަމަ ދާން ޖެހެނީ ކޯޓަށް ނޫން ހެއްޔެވެ؟
ޕަބްލިކް ޕޮލިސީގެ ދާއިރާއިން ޕީއެޗްޑީ ޙާސިލްކުރެއްވި ޑރ.ޚަލީލުގެ ވިސްނުންފުޅުގައި، ކުށެއް ނެތްކަން ސާބިތުކޮށްދިނުމަކީ ކުށެއްގެ ތުހުމަތުކުރެވޭ މީހާގެ ޒިންމާއެއް ކަމަށް ބުންޏަސް ދިވެހިރާއްޖޭގެ ޤާނޫނީ ނިޒާމްގައި އެކަން އޮތީ އެގޮތަކަށް ނޫނެވެ.
ދިވެހިރާއްޖޭގެ ޤާނޫނުލް އުޤޫބާތުގެ 15 ވަނަ މާއްދާގެ (ހ)ގައި ބުނެފައިޥާ ގޮތުގައި (ހ) އެކަށީގެންވާ މިންވަރެއްގެ ޝައްކެއްނެތި ކުށުގެ ކޮންމެ ރުކުނެއް ސާބިތުކުރެވިގެން މެނުވީ އެއްވެސް މީހެއްގެ މައްޗަށް ކުށެއް ސާބިތުކުރެވިގެންވާ ކަމަށް ނުބެލެވޭނެއެވެ. އެ މިންވަރަށް ހެކި ލިބެން ނެތް ހާލަތްތަކުގައި، ދައުވާ ރައްދުވާ މީހާއަކީ ކުށެއް ނުކުރާ މީހެއް ކަމުގައި ބެލެވޭނެއެވެ.
ރައްޔިތުންގެ މަޖިލީހުގެ މެންބަރުންގެ ތެރޭގައި ތިއްބެވި، ކުރީގެ ފިލްމް ސްޓާރެއް ނުވަތަ ކުރީގެ ފުޓްބޯޅަ ކުޅުންތެރިޔަކު ޚަލީލު މިދެއްކެވި ފަދަ ތާކުންތާކު ނުޖެހޭ ވާހަކައެއް ދައްކަވައިފި ނަމަ އެކަމާއި މެދު މައްސަލަ ޖައްސާނެ ކަމެއް ނެތެވެ. ރިސޯޓެއްގެ ބަދިގޭގައި ނުވަތަ ވެއިޓަރުކަން ކުރަން ހުރެފައި އައިސް މަޖިލީހަށް އިންތިހާބުވި މެންބަރަކު މިހެން ވިދާޅުވި ނަމަ ރައްޔިތުން އެކަން ބޮޑުކޮށްގެން އުޅޭނެ ހެނެއް ހިއެއް ނުވެއެވެ.
އެހެން ނަމަވެސް، ޕީއެޗްޑީ ޙާސިލްކުރައްވައިގެން ހުންނެވި މަޖިލިސް މެންބަރަކު މިފަދަ ތާކުންތާކު ނުޖެހޭ ވާހަކައެއް ދެއްކެވީމާ، ދެން އެއީ ތަންކޮޅެއް ބޮޑުވަރެވެ.