އައްޑޫގައި ސްޕެޝަލިސްޓް އޮޕަރޭޝަން (އެސްއޯ) ފުލުހުން ދާއިމީކޮށް ބައި ތިއްބަން ބޭނުންވާ ކަމަށް ފުލުހުން ބުނެފި އެވެ.
އަދި އެކަަމަށް އައްޑޫ މޭޔަރު އަބްދުﷲ ސޯދިގް (ސޯބެ) ވެސް ވަރަށް ބޮޑަށް މަރުހަބާ ވިދާޅުވާ ކަމަށް ފުލުހުން ބުންޏެވެ. އެހެން ނަމަވެސް އައްޑޫގެ ބައެއް ކައުންސިލަރުން އެކަމަށް އިންކާރު ކުރައްވާ ކަމަށް ފުލުހުން ބުންޏެވެ. ފުލުހުންގެ މީޑިއާ އޮފިޝަލް ހަސަން ހަނީފް މިއަދު ވިދާޅުވީ ކުށް މަދު ކުރުމަށް އައްޑޫގައި އެސްއޯ ފުލުހުން ދާއިމީކޮށް ތިބުމަކީ މުހިއްމު ކަމެއް ކަމަށެވެ. އަދި ފުލުހުން އެކަން ކުރަން ބޭނުންވާ ކަމަށް ވެސް އޭނާ ވިދާޅުވި އެވެ.
އެކަމަކު ފުލުހުންގެ ވާހަކައަށް މޭޔަރު މިއަދު ވަނީ ދޮގު ކުރައްވައިފަ އެވެ. އޭނާ ވިދާޅުވީ އެސްއޯ ފުލުހުން ދާއިމީކޮށް އައްޑޫގައި ބައި ތިއްްބަން ބޭނުން ނުވާ ކަމަށެވެ. އަދި އެކަން ވަރަށް ސާފުކޮށް ފުލުހުންނާ އެކު ބޭއްވި މީޓިންތަކުގައި ފާހަގަކޮށްފައި ވާނެ ކަމަށް މޭޔަރު ވިދާޅުވި އެވެ. އަދި މުޅި ކައުންސިލްގެ ވިސްނުން ވެސް ހުރީ އެގޮތަށް ކަމަށް އޭނާ ވިދާޅުވި އެވެ.
ސޯބެ ވިދާޅުވީ އެސްއޯ ފުލުހުން އައްޑޫގައި ބައި ތިއްބަން ބޭނުން ނުވަނީ ސަބަބުތަކާ ހެދި ކަމަށެވެ. އޭގެ ތެރޭގައި އެސްއޯ ފުލުހުންގެ ފަރާތުން މައްސަަލަތަކެއް ފާހަގަ ކުރެވިފައިވުމާއި އައްޑޫގައި ޕޮލިސް ސްޓޭޝަންގެ ކޮމާންޑަރަކަށް ހުންނަވާ ބޭފުޅެއްގެ އެއްވެސް ކޮންޓްރޯލެއް ވެސް އެސްއޯ ފުލުހުންގެ މައްޗަށް ނޯންނަ ކަމަށެވެ.
"އެސްއޯ ފުލުހުން މިތަނަށް އައިސް ހަރަކާތްތެރި ވަނީ އެ މީހުންގެ ހާއްސަ ކޮމާންޑަރެއްގެ ދަށުން. އައްޑޫގައި ހުންނަވާ ކޮމާންޑަރަށް ވާނުވާއެއް ނޭނގޭ. އޭނަގެ އެއްވެސް ބާރެއް ނޯވޭ. ހުރިހާ ކަމެއް މި ކޮންޓްރޯލްކޮށް ހިތު ހުރިހާ ގޮތަކަށް އޮޕަރޭޝަންތައް ޖަައްްސަނީ އެސްއޯގެ ކޮމާންޑަރުގެ އިރުޝާދާ އެކު،" މޭޔަރު ވިދާޅުވި އެވެ. "އަނެއްކާ އެސްްއޯ ފުލުހުންގެ ފަރާތުން މައްސަލަތަކެއް ފާހަގަ ކުރެވިފައި އެބަ ހުރި. އޭގެ ތެރޭގައި އާންމުންނަށް އަނިޔާ ކުރުމާއި ހަޑި ހުތުރު ބަހުން މުއާމަލާތް ކުރުން ވެސް ހިމެނޭ. މިކަންތައްތައް މީގެ ކުރިން ވެސް ވާނެ ފާހަގަކޮށްފައި."
މޭޔަރު ވިދާޅުވީ އެސްއޯ ފުލުހުން އައްޑޫގައި ބައި ތިއްބުމުގެ ބަދަލުގައި ކައުންސިލުން އެދިފައި ވަނީ މިހާރު ވެސް އައްޑޫގައި ތިބި ސިޓީ ފުލުހުންގެ އަދަދު އިތުރުކޮށް މަަސައްކަތް އިތުރަށް ހަރުދަނާ ކުރުމަށް ކަމަށެވެ.
"މިއީ ބޮޑު އާބާދީއެއް. ފުލުހުންގެ އަދަދު އިތުރުކޮށް ކުށްތައް މަދު ކުރުމަށް ސިޓީ ފުލުހުންގެ އަދަދު އިތުރުކޮށް ކުށްތައް މަދު ކުރަން މަސައްކަތް ކުރަން ފުލުހުން ބާރު އެޅުން އަޅުގަނޑުމެން ބޭނުން ވަނީ،" މޭޔަރު ވިދާޅުވި އެވެ. "މި އަހަރަކީ ރިޔާސީ އިންތިހާބެއް ވެސް އޮންނަ އަހަރަކަށް ވުމާ އެކު ހަލަބޮލިކަން އިތުރު ވާނެ."
އެސްއޯ ފުލުހުންގެ 40 މީހުންގެ ފައުޖަކާ އެކު އައްޑޫގައި "އަފިރިންގެ އަމާން އައްޑޫ ސިޓީ" ގެ ނަމުގައި އޮޕަރޭޝަނެއް ފެށީ ޖެނުއަރީ މަހުގެ 17 ވަނަ ދުވަހު އެވެ.
އެ އޮޕަރޭޝަނާ ގުޅިގެން ކުށް ކުރުން ވަރަށް ބޮޑަށް މަދު ކުރެވިފައިވާ ކަމަށް ގިނަ ބަޔަކު ފާހަގަ ކުރެ އެވެ.