ފުލުހެއްގެ ގަޔަށް ކުޅު ޖެހުމަށް ފަހު މާރާމާރީ ހިންގި މީހަކު ޖަލަށް ލުމަށް ކްރިމިނަލް ކޯޓުން ހުކުމްކޮށްފިއެވެ.
ދައުލަތުގެ ފަރާތުން އުފުލި ގައިގައި އަތްލުމުގެ ދައުވާ ސާބިތުވެ 1 މަހާއި 6 ދުވަހަށް ޖަލަށް ލުމަށް ހުކުމްކޮށްފައި ވަނީ ގދ.ރަތަފަންދޫ/ގަހާކޯޅި، ހުސައިން އަލިމަނިކުފާނެވެ.
ކްރިމިނަލް ކޯޓުގެ ހުކުމްގައި ބުނެފައިވާ ގޮތުގައި، ހުސައިން ވަނީ ބަންގްލަދޭޝް ހައިކޮމިޝަން ކުރިމަތީގައި ޑިއުޓީއަށް ހުރި ފުލުހަކަށް އިންޒާރުދީ ހަޑިހުތުރު ބަހުން އެއްޗެހި ކިޔުމަށްފަހު، ޖިންސީ ގުނަވަން ހާމަކޮށްފައެވެ.
އެ މައްސަލައިގެ ތުހުމަތުގައި ފުލުހުން ހުސައިން ހައްޔަރު ކުރަން އުޅުމުން އޭނާ ވަނީ ފުލުސް މީހާގެ ގަޔަށް ކުޅުޖެހުމުގެ އިތުރަށް ފައިން ޖަހައި މާރާމާރީ ހިންގާފައެވެ.
ހުސައިންގެ މައްޗަށް ކުރި ދައުވާއަށް އޭނާ ވަނީ އިބްތިދާޢީ މަރުޙަލާ އާއި ޝަރީޢަތުގެ މަޖިލީހުގައި ވެސް އިޢުތިރާފްވެފައެވެ.