މާލޭގެ ފިހާރައަކުން ސެންޓް ފުޅިއެއް ވަގަށް ނެގުމަށް ފަހު، ޖިންސު ތެރެއަށް ލައިގެން ފިލަން އުޅުނު މީހަކު 2 މަހާއި 12 ދުވަހަށް ޖަލަށް ލުމަށް ހުކުމްކޮށްފިއެވެ.
މި މައްސަލައިގައި ޖަލަށް ލުމަށް ހުކުމް އިއްވާފައި ވަނީ، ގ.ފެހިމާ، އިބްރާހިމް އަބްދުﷲ އެވެ. އޭނާގެ މައްޗަށް އުފުލާފައި ވަނީ، އެހެން މީހެއްގެ މުދަލެއްެގެ މައްޗަށް ހުއްދަ ނޫން ގޮތެއްގައި ބާރު ހިންގުމުގެ ކުށުގެ ދައުވާއެވެ.
ކްރިމިނަލް ކޯޓުގެ ހުކުމްގައި ބުނެފައިވާ ގޮތުގައި، މާލޭގެ ރެޑްވޭވް ފިހާރައިން ލުއިސް ކަރޑިއަން ބްރޭންޑްގެ ސެންޓް ފުޅިއެއް ނަގައި އިބްރާހިމް ލައިގެން ހުރި ޖިންސާއި ހަށިގަނޑުގެ ދޭތެރެއަށް ސެންޓްފުޅި ލުމަށްފަހު އަގު އަދާނުކޮށް ފިހާރައިން ނިކުންނަން އޭނާ އުޅެފައިވާ ކަމަށެވެ.
އިބްރާހިމްގެ މައްޗަށް ހުކުމް އިއްވާފައިވަނީ ޝަރީޢަތުގެ މަޖިލީހުގައި އޭނާ ވި އިޢުތިރާފްގެ މައްޗަށް ބިނާކޮށެވެ.