ފުލުހުންގެ ސްޕެޝަލިސްޓް އޮޕަރޭޝަންސް (އެސްއޯ)ގެ ކޮމާންޑަރު ބަދަލުކޮށްފި އެވެ.
މައުލޫމާތު ލިބިފައިވާ ގޮތުގައި އެސްއޯ ފުލުހުންގެ ކޮމާންޑަރަކަށް ހަމަޖައްސާފައި ވަނީ، ޓްރެފިކް ފުލުހުންގެ ކޮމާންޑަރަކަށް ހުންނެވި ޗީފް އިންސްޕެކްޓަރ އޮފް ޕޮލިސް އަބްދުލް މަތީން އަބްދުލް ކަރީމެވެ.
އެސްއޯގެ ކޮމާންޑަރަކަށް ކުރިން ހުންނެވި އިންސްޕެކްޓާރ އޮފް ޕޮލިސް އިބްރާހިމް މުހައްމަދު، މިހާރު ވަނީ ފުލުހުންގެ ކަސްޓޯޑިއަލް ޑިޕާޓްމަންޓުގެ ހެޑަކަށް ބަދަލުކޮށްފައެވެ.
ފުލުހުންގެ ޑިޕާޓްމަންޓުތަކުގެ ވެރިންނަށް ގެނައި ބަދަލުތަކާއި ބެހޭގޮތުން ފުލުހުން އަދި ވަކި އެއްޗެއް ހާމަކޮށްފައެއް ނުވެއެވެ.
އެސްއޯ ފުލުހުންގެ ކޮމާންޑަރު ބަދަލުކޮށްފައިވާއިރު މިއީ ފެބްރުއަރީ މަހުގެ ފަހުން އެމަގާމަށް ބަދަލު ގެނައި 3 ވަނަ ފަހަރެވެ.
ފެބްރުއަރީ 1 ގައި ސްޕްރީމް ކޯޓުން އިދިކޮޅު ސިޔާސީ ލީޑަރުން މިނިވަން ކުރުމަށް އަމުރު ނެރުނު އިރު، އެސްއޯގެ ކޮމާންޑަރަކަށް ހުންނެވި އިބްރާހިމެވެ.
އެހެން ނަމަވެސް ސުޕްރީމް ކޯޓުން އަމުރަށް ފަހު އޭރުގެ ޕޮލިސް ކޮމިޝަނަރަކަށް ހުންނެވި އަހުމަދު އަރީފް ވަނީ އެސްއޯގެ ކޮމާންޑަރަކަށް ސައިފް ހަމަޖައްސައިފަ އެވެ.
ސަރުކާރު ވައްޓާލަން އުޅުމުގެ ތުހުތަމުގައި ސައިފް ހައްޔަރުކުރުމަށް ފަހު މިހާރު ވަނީ ވަޒީފާއިން ވަކިކޮށްފައެވެ.