މޯލްޑިވިއަންގެ ފްލައިޓަކަށް ޓެކްނިކަލް މައްސަލައެއް ދިމާވުމާއި ގުޅިގެން، އެ ފްލައިޓުން ދަތުރުކުރަން ހަމަޖެހިފައިވާ 80 މީހުންނަށް މާލެ ނާދެވި އިންޑިޔާގައި މަޑުކުރަން ޖެހިއްޖެ އެވެ.
މޯލްޑިވިއަން އޮޕްރޭޓްކުރާ، އައިލެންޑް އޭވިއޭޝަނުގެ ހެޑް އޮފް އެޑްމިނިސްޓްރޭޝަން އަލީ ނަޝާތު އާއި ހަވާލާދީ، 'މިހާރު' ނޫހުގައި ރިޕޯޓްކޮށްފައިވާ ގޮތުގައި މައްސަލަ ދިމާވެފައިވަނީ އެއާބަސް 321 މަރުކާރުގެ، 200 މީހުންގެ ޖާގައިގެ ފްލައިޓަށެވެ.
އެ ފްލައިޓް ޓްރިވަންޑްރަމުން މާލެ އަށް ފުރުމަށް ހަމަޖެހިފައި އޮތީ މިއަދު ހެނދުނު 10:30 ގަ އެވެ.
ނަޝާތު ވިދާޅުވި ގޮތުގައި، ފްލައިޓަށް މައްސަލަ ދިމާވުމުގެ ސަބަބުން ރާއްޖެ ނާދެވި ތިބި ފަސިންޖަރުންނަށް ހުރުމާއި ކެއުން މޯލްޑިވިއަން އިން ވަނީ ހަމަޖައްސައިދީފައެވެ.