މިއަހަރުގެ ރިޔާސީ އިންތިހާބު މިނިވަން އަދި އިންސާފުވެރި އިންތިހާބަކަށްވާނީ، ރައީސް އަބްދުﷲ ޔާމީންގެ ނަންފުޅު ނެތި އިންތިހާބު ބޭއްވިގެންކަމަށް ރަމަޑުއްވަރީ ދާއިރާގެ މެމްބަރު މުހައްމަދު އަމީތު ވިދާޅުވެއްޖެ އެވެ.
އަމީތު ކުރެއްވި ޓްވީޓެއްގައި މިހެން ވިދާޅުވެފައި ވާއިރު، އަމީތުގެ އިތުރުން ވެސް ސިޔާސީ ފަރާތްތަކުން ގެންދަނީ ރައީސް ޔާމީންގެ ނަންފުޅު ވޯޓު ކަރުދާހުގައި ނޯންނާނެ ކަމަށް ވިދާޅުވަމުންނެވެ.
އަމީތު ވިދާޅުވީ، އިންތިހާބު އިންސާފުވެރި އިންތިހާބަކަށް ވެގެންދާނީ ވޯޓު ކަރުދާސްކޮޅުގައި އަބްދުﷲ ޔާމީންގެ ނަން ނެތި އިންތިހާބު ބޭއްވިގެން ކަމަށާއި އެއީ މިވަގުތަށްވެސް، އަދި ފަހަށް ވެސް ތަނަވަސްވާންޖެހޭ މާހައުލުކަމަށެވެ.
އިދިކޮޅު ފަރާތްތަކުން އިންތިހާބު ބޭއްވުމަށް މިނިވަން މާހައުލެއް ނެތްކަމަށް ވިދާޅުވަމުން ގެންދަވާއިރު އެވާހަކަތައް އިލެކްޝަންސް ކޮމިޝަނުން ދޮގުކުރެއެވެ.