އައްޑޫ ސިޓީ، ހިތަދޫ ބޮޑުމަގުގައި ހުންނަ ފިހާރައެއްގައި މަސައްކަތް ކުރާ ޒުވާން އަންހެނަކަށް އޭނާގެ ވަޒީފާގެ މާޙައުލުގައި ޖިންސީ ފުރައްސާރަ އާއި ކުރިމަތިލާން ޖެހުނު މައްސަލަ ފެންމަތިވިތާ މިއަދަށް 10 ދުވަސް ވާނެއެވެ.
ޖިންސީ ފުރައްސާކުރާ ކަމުގެ ޝަކުވާ އެކި ފަހަރު މަތިން އެ އަންހެން މީހާ ދިޔައީ އެކި ފަރާތްތަކާއި ހިއްސާކުރަމުންނެވެ. އެހެން ނަމަވެސް އެ އަޑުތަކަށް ގިނަ ބަޔަކު ދިނީ ބީރު ކަންފަތެެކެވެ.
އެތައް ދުވަހެއް ވަންދެން، ވަޒީފާގެ މާޙައުލުގައި ކުރިމަތިވަމުން ދިޔަ ކަންތަކަށް ނިމުމެއް ގެނައީ އެ އަންހެންމީހާގެ ހިތްވަރުގަދަ ކަމުންނެވެ. ފިހާރައިގެ މެނޭޖަރެއްގެ ވަޒީފާ އަދާކުރަމުން ދިޔަ، ފިރިހެނަކު އެ ކުއްޖާ އާއި ބޭއަދަބީ ވާހަކަތަކެއް ދައްކަނިކޮށް ރިކޯޑްކޮށް ސޯޝަލް މީޑިޔާގައި އާއްމުކުރިއެވެ.
އެހިސާބުން ގިނަ ބަޔަކު އެވާހަކަ ޤަބޫލުކޮށް އެކަމާއި ކަންބޮޑުވުން ފާޅުކުރަން ފެށިއެވެ. އެހެން ނަމަވެސް، އެއް ބަޔަކަށް ގޯސްވީ އެ ކަން ފަޅާއަރުވާލި އަންހެން މީހާއެވެ. ފިރިހެން މީހާ ދެއްކި ވާހަކަތައް އެއީ ރަނގަޅު ވާހަކަތެއް ކަމަށް އެއްބަޔަކު ނިންމިއެވެ.
އެހެން ނަމަވެސް، ފިހާރައިގެ ކައުންޓަރުގައި ކޭޝިއަރަކަށް އިންނަ އަންހެން މުވައްޒަފެއްގެ، ޖަނގިޔާ ދޮންނަ ވާހަކަ އާއި ބަދު އަޚުލާޤީ ޢަމަލު ހިންގާ ވާހަކަ ދެއްކުމަކީ، ޖިންސީ ފުރައްސާކުރުން ކަމުގައި ނުވާނެ ހަމަ އެއްގޮތެއް ވެސް ނެތެވެ.
ސޯޝަލް މީޑިޔާގައި ގިނަ ބައެއްގެ ފާޑުކިޔުންތައް އަމާޒުވި ހިސާބުން، އެ މައްސަލަ ޕޮލިހުން ވެސް ބަލަން ފެށިއެވެ. ޖެންޑާ އިން ވެސް މައްސަލަ ބަލަން ފަށާފައިވާއިރު އެކަމުގައި ޝާމިލުވާ ފިރިހެން މީހާގެ ބަޔާނެއް ނެގި ކަމެއް ނޭނގެއެވެ.
'އައްޑޫލައިވް' އާއި ވާހަކަ ދެއްކި ޖެންޑާ މިނިސްޓްރީގެ ކުރީގެ އޮފިޝަލަކު ބުނިގޮތުގައި، ޖިންސީ ފުރައްސާރައިގެ ޝިކާރައަކަށްވި އަންހެން މީހާ ހުރީ "ގިނިކަންޏާ" ކަމަށެވެ.
"އަންހެން މީހާއަށް، އައްޑޫގެ އެއްވެސް ޖަމިއްޔާއެއް، ނުވަތަ ކައުންސިލަރެއް އަދި ސިޔާސީ މީހަކު ވެސް އެހީތެރިކަމެއް ފޯރުކޮށްދީފައެއް ނުވޭ. މިއީ ލަދުވެތި ކަމެއް. އަންހެނުންގެ ހައްގުތަކުގެ ވާހަކަ އެންމެން ދައްކާ. އެކަމަކު ހައްގު ހޯދައިދޭން ވީމާ ފަތް ދަށަށް ވަދެ ފިލަނީ ނޫންތޯ؟" އޭނާ ބުންޏެވެ.
އަންހެނުންގެ ދުވަސް ފާހަގަކުރި އިރު އައްޑޫގައި ވެސް އެތައް ޖަމިއްޔާ އަކާއި އެތައް އޮފީހަކުން، ތަފާތު އެކި ޝުޢޫރުތަކާއި އެކު ކޭކު ފަޅައި ހަރަކާތްތައް ހިންގިއެވެ. އަންހެނުންނަށް ކުރާ އަނިޔާ ހުއްޓާލުމަށް ގޮވާލައި ޓްވީޓުތަކާއި ފޭސްބުކް ޕޯސްޓްތައް ވެސް ކުރިއެވެ.
އެހެން ނަމަވެސް، މިއަދު އައްޑޫއަށް ނިސްބަތްވާ ކަނބަލެއް ޖިންސީ ފުރައްސާރައިގެ ޝިކާރައަކަށް ވުމުން އޭނާގެ އަތުގައި ހިފައިގެން އިންސާފު ހޯދައިދޭން މަސައްކަތް ކުރަން ކެރޭ އެކަކު ވެސް ނެތެވެ.
ތަފާތު އެކި ނަންނަމުގައި އައްޑޫގެ ކަނބަލުންގެ "ކުރިއެރުމާއި ހައްޤުތަކުގެ ދިފާޢުގައި" ކަމަށް ބުނެ ހިންގާ ޖަމިއްޔާތަކުގެ ތެރެއިން އެއްވެސް ޖަމިއްޔާއަކުން މި މައްސަލައިގައި އެއްޗެއް ނުބުނު ހަނު ތިބުމަކީ، އެއީ ލަދުވެތި ކަމެކެވެ.