ރިޔާސީ އިންތިޚާބުގައި ރައީސް ޔާމީން ވާދަ ކުރެއްވުމަށް ރައީސް އަބްދުﷲ ޔާމީން ފޫގަޅައިގެން ހުންނެވި އިރު އެމަނިކުފާނުގެ ބޯމަތީގައި ހުރީ އެތައް ބިލިއަނެއްގެ ކޮރަޕްޝަނުގެ ތުހުމަތުތައް ކަމަށް މީދޫ ދާއިރާގެ މެންބަރު ރޮޒައިނާ އާދަމް ވިދާޅުވެއްޖެއެވެ.
ރާއްޖެޓީވީގެ ފަލަ ސުރުޚީ ޕްރޮގްރާމްގައި ވާހަކަ ދައްކަވަމުން ރޮޒައިނާ ވިދާޅުވީ، ރިޔާސީ އިންތިޚާބުގައި ރައީސް ޔާމީން ވާދަ ކުރައްވާނަމަ އެމަނިކުފާނާމެދު ކުރެވޭ ކޮރަޕްޝަން ތުހުމަތުތަކުން ބަރީއަވާން ޖެހޭނެ ކަމަށެވެ.
މީގެ އިތުރުން ރޮޒެއިނާ ވަނީ ރައީސް ޔާމީންގެ އަމިއްލަފުޅު އެކައުންޓުގައި "މިލިއަނުން މިލިއަނުން ރުފިޔާއާއި ޑޮލަރު ހުރިކަމަށް" ވެސް ވިދާޅުވެފައެވެ.
"މިނިވަން އިންތިޚާބެއް މިހާރު މިޤައުމުގައި ބާއްވާކަމުގައި ވަންޏާ ރައީސް ޔާމީން ކެނޑިޑޭޓަކަށް ނުކުންނަވާއިރު އެމަނިކުފާނަށް ކުރެވިފައި މިހިރަ ހުރިހާ ކޮރަޕްޝަންތަކުން އެމަނިކުފާނު ބަރީއަވާން އެބަޖެހޭ" ރޮޒައިނާ ވިދާޅުވިއެވެ.