ރައީސް އަބްދުﷲ ޔާމީން މަގާމުން ވަކި ކުރުމަށް ފަހުގައި ނޫނީ ރިޔާސީ އިންތިހާބަށް ދިއުމަށް ގިނަ ބަޔަކު ނޭދޭ ކަމަށް ވާޖުމްހޫރީ ޕާޓީގެ ޑެޕިއުޓީ ލީޑަރު އަމީން އިބްރާހިމް މިއަދު ވިދާޅުވެއްޖެ އެވެ.
އަމީން މިހެން ވިދާޅުވެފައިވަނީ، އިދިކޮޅު ފަރާތްތަކުން 1 ކެންޑިޑޭޓް ނެރުމަށް ކުރާ މަސައްކަތްތަށް ނިލަންދޫ ދާއިރާގެ މެންބަރު އަބްދުﷲ ޚަލީލް ފާޑުވިދާޅުވެފައިވާތީ އެކަމަށް ރައްދު ދެއްވައި ކުރެއްވި ޓްވީޓެއްގައެވެ. ޚަލީލު ވިދާޅުވެފައި ވަނީ، އިދިކޮޅު ޕާޓީތަކުން އެއް ކެންޑިޑޭޓަކު ނެރެން ކުރާ މަސައްކަތް ދާނީ ފަނުފުލުން ކަމަށެވެ.
ޚަލީލަށް ރައްދު ދެއްވައި އަމީން ވަނީ އެފަދަ ވާހަކަ ދައްކަނީ ޔާމީން މަގާމުން ދުރުކުރަން ކުރާ މަސައްކަތުގެ މިސްރާބު ބަދަލުކޮށް ގުޅިފައިވާ ޕާޓީތައް ކެމްޕެއިނަށް ނެރެން ނޫންތޯ ސުވާލު ކުރައްވާފައެވެ.
"ޔާމީން ބޭލުމަށް ފަހު ނޫނީ އިންތިހާބަކަށް ދާކަށް ގިނަ ބަޔަކު ނޭދޭ. މި ހާލަތުގައި ޔާމީނާ އެކު އިންތިހާބަަކަށް ދިއުމަކީ ބޮޑު ގޯހެއް،" އަމީން ވިދާޅުވި އެވެ.
އަމީން މިހެން ވިދާޅުވެފައި ވާއިރު، އިދިކޮޅު ޕާޓީތަކުން ދަނީ ރައީސް ޔާމީން ބޭނުންފުޅުވާ ބަޔަކު އިލެކްޝަން ކޮމިޝަންގައި ބައިތިއްބައިގެން މިނިވަން އިންތިހާބެއް ބޭއްވޭނެ ކަމަށް ގަބޫލު ނުކުރައްވާ ކަމަށެވެ.
އިލެކްޝަންސް ކޮމިޝަނުގެ ރައީސްކަމުގައި މިހާރު ހުންނެވި ޝަރީފަކީ ވަރަށް ފަހަކާއި ޖެހެންދެން "ރައީސް ޔާމީން 2018" ކެމްޕެއިންގައި އުޅުއްވި ބޭފުޅެކެވެ.