ގިނަ ބައެއްގެ ތަރުހީބާ އެކު ދާދި ފަހުން "ހަވީރު" ގައި ޝާއިއުކޮށް ނިންމާލި މަޝްހޫރު ވާހަކަ ލިއުންތެރިޔާ ބިންމާ އިބްރާހީމް ވަހީދުގެ ވާހަކަ "ހިންތާ" ގެ ދެވަނަ ބައެއް ގެނެސް ދޭން އޭނާ ނިންމައިފި އެވެ.
ކިޔުންތެރިންގެ އެދުމުގެ މަތިންނާ އެކު "ހިންތާ" ގެ ދެވަނަ ބައި "ހިންތާ: ޔުމްނާގެ އެނބުރި އައުން" ގެނެސް ދޭނީ އަންނަ އަހަރު ކަމަށް ބިންމާ އޭނާގެ އެފްބީ ޕޭޖްގައި ބުނެފައިވެ އެވެ. އެހެން ނަމަވެސް ކިޔުންތެރިން އަދި މި ވާހަކައިގެ ދެވަނަ ބަޔަށް ދިގު އިންތިޒާރެއް ކުރަން ޖެހެ އެވެ.
މިދިޔަ އަހަރުގެ އޮކްޓޯބަރު މަހުގެ 21 ވަނަ ދުވަހު "ހަވީރު" ގައި ޝާއިއު ކުރަން ފެށި "ހިންތާ" ގެ ފުރަތަމަ ބައި ނިމިފައި ވަނީ މި މަހުގެ 14 ވަނަ ދުވަހު އެވެ.
"ހިންތާ" ވާހަކައިގައި ކިޔައި ދެނީ ފައިސާ އާއި ތަނަވަސް ކަމަށްޓަކައި އޭނާ ބަލައި ބޮޑު ކުރި މައިިންބަފައިންނާއި އަނބިމީހާގެ އިތުރުން ލޯބިވެރިޔާ އަށް ވެސް އޮޅުވާލައިގެން މުއްސަނދިކަން ހޯދަން އުޅޭ ދަހިވެތި ފިރިހެނެއްގެ ވާހަކަ އެވެ.
އަދި މި ކުޅިގަނޑުގެ ތެރޭގައި މައުސޫމް އަންހެން ކުއްޖެއްގެ ދިރިއުޅުމަށް އަންނަ ލޮޅުންތައް ނޭވާ ހިފަހައްޓާލަން ޖެހޭ ފަދަ ގޮތަކަށް "ހިންތާ" ގައި ގެނެސް ދީފައިވެ އެވެ.