މިދިޔަ އަހަރުގެ ފެބްރުއަރީ މަހުގެ 8 ވަނަ ދުވަހުގެ ރޭ އައްޑޫ މޭޔަރު އަބްދުﷲ ސޯދިގް (ސޯބެ) އަށް ހަމަލާދީ މާރާމާރީ ހިންގި މައްސަލާގައި ދައުވާ ކުރާ ދެ މީހުންގެ މައްޗަށް ކުށް ސާބިތު ނުވާ ކަމަށް ހިތަދޫ މެޖިސްޓްރޭޓް ކޯޓުން މިއަދު ހުކުމްކޮށްފި އެވެ.
އެ ދެ މީހުންގެ މައްޗަށް ކުށް ސާބިތު ނުވާ ކަމަށް ހުކުމްކޮށްފައި ވަނީ މިއަދު މެންދުރު ފަހު 2:45 ގައި ބޭއްވި ޝަރީއަތުގަ އެވެ.
މޭޔަރަށް ހަމަލާ ދީ އަތް ބިންދާލައި އެކި ވަރުގެ އަނިޔާތައް ދިން މައްސަލާގައި ދައުވާކޮށްފައި ވަނީ ސ. ހިތަދޫ ޖަނބުރޯލްމާގޭ އަހުމަދު ހަސަންދީދީ (ސިއްރާ) އާއި ހިތަދޫ ސާދާގެ މޫސާ ފަތުހީ (ސާދާގެ މޫސާ) ގެ މައްޗަށެެވެ.
އެ ދެ މީހުންގެ މައްޗަށް ދައުވާ ކުރުމަށް ޕްރޮސެކިއުޓާ ޖެނެރަލް (ޕީޖީ) އޮފީހުން ކޯޓަށް ހުށަހެޅީ މިދިޔަ އަހަރުގެ ނޮވެމްބަރު މަހުގެ 27 ވަނަ ދުވަހު އެވެ.