ކުރީގެ ރައީސް އަލްއުސްތާޛް މައުމޫން އަބްދުލް ޤައްޔޫމް ޖަލުގެ ކުޑަގޮޅިއަށް ލައިގެން އުޅެނީ ރައީސް ޔާމީންގެ ސިޔާސީ ކަރުހިއްކުން ފިލުވަން ކަމަށް އަދާލަތު ޕާޓީގެ ނާއިބް ރައީސް އަލީ ޒާހިރު ވިދާޅުވެއްޖެއެވެ.
އަލީ ޒާހިރު މިހެން ވިދާޅުވެފައި ވަނީ، ރައީސް މައުމޫން މިނިވަންކުރުމަށް ގޮވާލައި އިދިކޮޅު ޕާޓީތަކުން ބޭއްވި ޕެނަލް ޑިސްކަޝަން އެއްގައި ވާހަކަ ދައްކަވަމުންނެވެ.
އެ ޑިސްކަޝަންގައި ވާހަކަ ދައްކަވަމުން އަލީ ޒާހިރު ވިދާޅުވެފައި ވަނީ އުމުރުފުޅުން 80 އަހަރަށްވުރެ މަތީގެ ރައީސް މައުމޫން ގާނޫނާ ޚިލާފަށް ޖަލުގައި ބަންދުކޮށްގެން ދެވެމުންދަނީ ބޮޑު އަނިޔާއެއް ކަަމަށެވެ.
އަލީ ޒާހިރު ވަނީ މީގެ އިތުރުން ރައީސް މައުމޫން ބަންދުކޮށްފައި ވަނީ ފުލުހުންނާއި ކޯޓުތަކަށް ސިޔާސީ ނުފޫޒު ފޯރުވައިގެން ކަމަށް ތުހުމަތު ކުރައްވާފައެވެ.
އަލީ ޒާހިރު ވިދާޅުވީ، ރައީސް މައުމޫން ބަންދުކޮށްފައިވަނީ ރައީސް ޔާމީނުގެ ސިޔާސީ ކަރުހިއްކުން ފިލުވަން ކަމަށެވެ.
"ޔާމީނަކީ ލީޑަރޝިޕް ކޮލިޓީ އެއްވެސް ވަރަކަށް ނެތް ބޭފުޅެއް. އެއާ ޚިލާފަށް ރައީސް މައުމޫނަކީ ދިގު ތާރީޚެއް އޮތް، ތަޖުރިބާތަކެއް ހުރި އަދި އެކަން މުޅި ދުނިޔެއަށް ވެސް ހާމަކުރައްވާފައިވާ ލީޑަރެއް." އަލީ ޒާހިރު ވިދާޅުވިއެވެ.