އިނގިރޭސި ފުޓްބޯޅަ ކްލަބް އާސެނަލްގެ ކޯޗު ކަމުގެ މަގާމު އަދާކުރާތާ 21 އަހަރުވެފައިވާ އާސެން ވެންގަރ މި ސީޒަނަށް ފަހު އެ ކްލަބް ދޫކޮށްލަން ނިންމައިފިއެވެ.
1996 ވަނަ އަހަރު އާސެނަލްގެ ކޯޗުކަމާއި ހަވާލުވި ވެންގަރ ނެރުނު ބަޔާނެއްގައި ބުނެފައިވާ ގޮތުގައި މިއީ ކޯޗުކަމުގެ މަގާމުން ދުރަށް ދިއުމަށް އެންމެ ރަނގަޅު ވަގުތު ކަމަށެވެ. ވެންގަރ ބުނެފައިވާ ގޮތުގައި އޭނާ އާސެނަލް ދޫކޮށްލުމަށް ނިންމާފައި ވަނީ، ވަރަށް ރަނގަޅަށް އެކަމާއި މެދު ވިސްނުމަށްފަހު ކްލަބާއި ވެސް މަޝްވަރާ ކުރުމަށް ފަހުގައެވެ.
ފާއިތުވި ސީޒަނުގައި އިނގިރޭސި ލީގުގެ 5 ވަނަ އާސެނަލް އަށް ލިބި ޗެމްޕިއަންސް ލީގުން ފުރުސަތު ނުލިބުމުން އެ ޓީމުގެ ސަޕޯޓަރުން ވަނީ ވެންގާރ މަގާމުން ދުރުކުރުމަށް ކެމްޕެއިން ފެށިއެވެ. އެކަންތައް ކޮންމެވެސް ވަރަކަށް ހަމައަކަށް އެޅުނީ، އާސެނަލްއަށް އިނިގިރޭސި އެފްއޭ ކަޕް މިދިޔަ ސީޒަނުގައި ކާމިޔާބު ކޮށްދިނުމުންނެވެ.
އޭގެ ނަތީޖާއެއްގެ ގޮތުން އެ ކްލަބުގެ މެނޭޖްމަންޓުން ވަނީ އިތުރު ދެ އަހަރު ވަންދެން އޭނާ އެ ކްލަބުގައި މަޑުކުރުވާފައެވެ. އެއްބަސްވުމުގެ މުއްދަތު ހަމަވާނީ، 2019 ވަނަ އަހަރުގެ ނިޔަލަށެވެ.
އާސެނަލްގެ ކޯޗުކަމުން ވެންގާ ވަކިވާނެ ކަން އިއުލާންކޮށްފައިވާއިރު، އޭނާ މަގާމުން ވަކިކުރަން އެ ޓީމުގެ ބޯޑުން މަޝްވަރާ ކޮށްފައިވާ ކަމަށް ވެސް މީގެ ކުރިން އިނގިރޭސި މީޑިޔާގައި ރިޕޯޓްކޮށްފައިވެއެވެ.