އެމްޑީޕީގެ ވެރިކަމުގައި އައްޑޫ ސިޓީގެ މަގުތައް ހެދުމަށް ގެނައި މެޝިނަރީޒް އާއި އެހެނިހެން ސާމާނު، ރައީސް ޔާމީންގެ ސަރުކާރުން އައްޑޫން ބޭރުކޮށްފައިވާ ކަމަށް އައްޑޫ ސިޓީގެ ޑެޕިއުޓީ މޭޔަރު މުހައްމަދު ޔަސްރިފް ވިދާޅުވެއްޖެއެވެ.
ޔަސްރިފް މިހެން ވިދާޅުވެފައި ވާއިރު އައްޑޫގެ އަވަށްތަކުގެ މަގުތައް ބެލެހެއްޓުމުގެ ޒިންމާ ހައުސިން މިނިސްޓްރީއަށް އަދާ ނުކުރެވޭ ކަމުގެ ޝަކުވާ އިތުރުވެފައެވެ. 2015 ވަނަ އަހަރު އައްޑޫގެ މަގުތައް ހައުސިން މިނިސްޓްރީގެ ދަށަށް ގެންގޮސްފައިވާއިރު، މިހާތަނަށް އައްޑޫގެ އެއްވެސް މަގެއް ހެދުމުގެ މަސައްކަތް ފެށިފައެއް ނުވެއެވެ.
ޔަސްރިފް ވިދާޅުވި ގޮތުގައި، ރައީސް ޔާމީންގެ ސަރުކާރުން ވަނީ އައްޑޫގެ މަގުތައް ނަަހަދައި މަގު ހަދަން ބޭނުންވާ މެޝިނަރީޒް ތައް އައްޑޫން ބޭރުކޮށްފައެވެ.
ބެލެވޭ ގޮތުގައި ޔަސްރިފް އިޝާރާތް ކުރެއްވީ، އައްޑޫގައި ހުރި ތާރުއަޅާ މެޝިނަކާއި މަގުހަދަން ބޭނުންކުރާ ބައެއް ވެހިކަލްތައް އައްޑޫން ގެންދިޔުމަށެވެ.
އައްޑޫ އިން ވެހިކަލްތަކާއި މެޝިނަރީޒް ބޭރުކުރާ ކޮންމެ ފަހަރަކު އެތަކަތި "ވަރަށް އަވަހަށް އަނބުރާ ގެނެވޭނެ" ކަމަށް ސަރުކާރުގެ އޮފިޝަލުން ވިދާޅުވެއެވެ. އެހެން ނަމަވެސް އެގޮތަށް ގެންދިޔަ އެއްވެސް ވެހިކަލެއް އަދި މެޝިނަރީޒް ތަކެއް ވެސް އަނބުރާ ގެނެސްފައި ނުވާކަން ފާހަގަކޮށްލެވެއެވެ.