އައްޑޫ ސިޓީ، ހިތަދޫން މިއަދު މޫދަށް އެރިގެން އުޅެނިކޮށް ގެއްލުނު ދެ ކުދިން ހޯދުމަށް ނައިޓް ވިޝަން ޑިވައިސް ބޭނުންކުރަމުން އަންނަ ކަމަށް އެމްއެންޑީއެފުން ބުނެފި އެވެ.
ފުޓްބޯޅަ ޕްރެކްޓިސް ނިންމުމަށްފަހު، ހިތަދޫ ހޮސްޕިޓަލާއި ދިމާލަށް މޫދަށް އެރި އުޅެނިކޮށް ގެއްލިފައިވަނީ ހިތަދޫ ޗަނބޭލީގޭ އަލީ ފަހުމީ އާއި ޓޮޕާޒް މަޔާމީން އަލީ އެވެ. ދެކުދިންނަކީ ވެސް ހިތަދޫ ސްކޫލްގައި ކިޔަވަމުން އަންނަ ކުދިންނެވެ.
އެމްއެންޑީއެފްގެ އިންފޮމޭޝަން އޮފިސަރު އިބްރާހިމް އާޒިމް ވިދާޅުވެފައިވާ ގޮތުގައި ނައިޓް ވިޝަން ޑިވައިސްތައް ބޭނުންކޮށްގެން އެމްއެންޑީއެފްގެ ލޯންޗުތައް އެ ދެ ކުދިން ހޯދުމުގެ މަސައްކަތް މިހާރު ވެސް ގެންދަނީ ކުރަމުންނެވެ.
އެމްއެންޑީއެފުން ކުރިއަށް ގެންދާ ސާޗް އެންޑް ރެސްކިއު އޮޕަރޭޝަންތައް ރޭގަނޑު ވަގުތުތަކަށް މެދުކަނޑާލި ނަމަވެސް، 2 ކުދިން ހޯދުމުގެ މަސައްކަތް ހުއްޓުމެއް ނެތި މިރޭ ވެސް ކުރިއަށް ގެންދާނެ ކަމަށް އެމްއެންޑީއެފުން މައުލޫމާތު ދެއެވެ.
މިއަދު މެންދުރު 12 ޖަހާކަށް ހާއިރު ގެއްލުނު ދެކުދިން ހޯދުމަށް އެމްއެންޑީއެފްގެ ޑައިވަރުންގެ އިތުރުން ސަދަން އޭރިޔާގައި އޮންނަ ހެލިކޮޕްޓަރު ވެސް ވަނީ ބޭނުންކޮށްފައެވެ.