އދ. ދަނގެތި ޕޮލިސް ސްޓޭޝަނުން ހިންގި އޮޕަރޭޝަނެއްގައި މަސްތުވާތަކެތީގެ ބާވަތެއްކަމުގައިވާ މެރުއާނާ ކަމަށް ބެލެވޭ ގަސްތަކަކާއެކު މީހަކު ހައްޔަރުކޮށްފިއެވެ.
ފުލުހުންގެ ވެބްސައިޓްގައި ބުނެފައިވާ ގޮތުގައި އދ. ދަނގެތިން ހައްޔަރުކޮށްފައި ވަނީ އުމުރުން 31 އަހަރުގެ ފިރިހެނެކެވެ. އޭނާ ފުލުހުންގެ ބެލުމުގެ ދަށަށް ގެންދިޔައީ އެޕްރީލް މަހުގެ 15 ވަނަ ދުވަހުއެވެ.
އެމީހާ ހައްޔަރުކުރުމަށް ފުލުހުން ހިންގި އޮޕަރޭޝަނުގައި އޭނާ ދިރިއުޅޭ ގޭގެ ގޯތިތެރެއިން މެރުއާނާ ގަސްތަކެއްކަމަށް ބެލެވޭ 4 ގަސް ފެނިފައިވެއެވެ. އަދި މީގެ އިތުރުން އެ ގޭގެ ކޮޓަރިއެއްގެ ތެރެއިން މަސްތުވާތަކެތިކަމަށް ޝައްކުކުރެވޭ އެއްޗެއްހުރި ދަޅަކާއި މެރުއާނާ ފަތްތަކެއް ފެނިފައިވާކަމަށް ފުލުހުން ހާމަކުރެއެވެ.
މައުލޫމާތު ލިބިފައިވާ ގޮތުގައި މިމައްސަލާގައި ހައްޔަރުކޮށްފައިވާ މީހާގެ ބަންދަށް އދ. މަހިބަދޫ މެޖިސްޓްރޭޓް ކޯޓުން ވަނީ 15 ދުވަސް ޖަހައި ދީފައެވެ.